Fransanın ən nüfuzlu qəzeti Le Monde-un baş redaktoru, Avropanın ən məşhur jurnalistlərindən biri sayılan Erik İzraileviç ölüb.
2011-ci ildən bəri Le Monde-a başçılıq edən 58 yaşlı “İzra” ləqəbli İsraileviçin kəskin ürəktutmadan öldüyü bildirilir.
Qəzetin Parisdəki mərkəzi ofisində olarkən dünən qəflətən ürəktutması keçirən İzraileviç dünən axşam saatlarında xəstəxanaya çatdırılsa da, həkimlər onu xildas edə bilməyiblər.
Le Monde şirkətinin direktorlar şurasının sədri Lüis Dreyfus: “Gözəl və inanılmaz dərəcədə ağıllı insanı itirdik”, – deyib.
Fransanın sabiq prezidenti Nikolya Sarkozinin qatı əleyhdarı olan İzraileviçin tutduğu mövqe nəticəsində ölkədə keçirilmiş ötən seçkilərdə Olland güclü dəstək qazanmışdı.
Le Monde-un baş redaktoru olmaqla yanaşı, Telerama jurnalı və Courrier International-ın da baş direktoru olan İzraileviç jurnalist karyerasında Les Echos və La Tribune-dakı işləri ilə tanınmışdı.(milli.az)
