Müzəffər Baxışov: «Hüquq-mühafizə orqanlarına verilən göstərişə əsasən onlar Sevinc Babayevanın Azərbaycandan çıxmasına şərait yaradıblar»
ABU-nun keçmiş rektoru Elşad Abdullayevin parlamentdəki deputat yerlərinin rüşvət müqabilində satıldığını sübut edən video görüntülərdəki şəxslərdən biri Sevinc Babayeva ilə bağlı mətbuatda müxtəlif məlumatlar yazılmaqdadır. Hazırda ölkədən xaricdə olduğu deyilən S.Babayevanın baş verən hadisədə əsas şahid və tərəflərdən biri olmasına baxmayaraq onun ölkədən çıxmasına heç bir əngəl törədilməyib.
Belə ki, xırda qanun pozuntusu baş verən zaman şəxsin şəhərdən və ya ölkədən kənara çıxması yasaqlansa da, eyni yanaşma S.Babayevaya münasibətdə sərgilənməyib. Halbuki S.Babayevanın bu işlə bağlı olduğu hələ videogörüntülər ictimailəşdirilmədən məlum idi.
Bu baxımdan S.Babayevanın hüquq-mühafizə orqanlarının “diqqətində” olmalı olduğu bir zamanda ölkədən necə çıxa bilməsi bir sıra suallar doğurmamış deyil. Digər tərəfdən, S.Babayevanın xaricdə axtarışa verilib-verilməməsi də məlum deyil. Bu suallara hüquq-mühafizə orqanlarından cavab almaq cəhdlərimiz bir nəticə vermədi.
Hüquqşünas Müzəffər Baxışovla məsələnin hüquqi tərəfinə aydınlıq gətirdik. M.Baxışov bildirdi ki, Pasportlar Haqqında Qanunun 1-ci maddəsinə görə, bir kəs şübhəli və təqsirləndirilən sayılırsa, o zaman onun ölkə ərazisini tərk etməsinə məhdudiyyət qoyulur: “Indi mən bilmirəm istintaq orqanı Sevinc Babayevanı təqsirləndirilən şəxs qismində cəlb edib, yoxsa yox. Amma Sevinc Babayevanın törətdiyi dələduzluq cinayəti istintaq orqanına çoxdan bəllidir. Elşad Abdullayev hüquq-mühafizə orqanlarına bu faktlar barədə əvvəlcədən də məlumat vermişdi. Düşünürəm ki, hüquq-mühafizə orqanlarına verilən göstərişə əsasən onlar Sevinc Babayevanın Azərbaycan ərazisini tərk etməsinə şərait yaradıblar. Məqsəd ondan ibarətdir ki, Sevinc Babayeva Gülər Əhmədovanın işi üzrə ciddi şahidlərdən biridir. Gələcəkdə Gülər Əhmədovanın epizodu üzrə cinayət icraatını dayandırmaq məqsədilə qəsdən şərait yaradıblar ki, o, Azərbaycan ərazisini tərk etsin. Və ya Sevinc Babayevanın gizlənməsini təmin ediblər. Ya da Sevinc Babayeva ola bilsin ki, kimlərinsə köməkliyi ilə gizli yollarla Azərbaycandan çıxarılıb”.
Ümumiyyətlə, S.Babayevanın cinayət məsuliyyətinə cəlb etmək üçün uzun müddət çox ciddi əsasların olduğunu deyən M.Baxışov vurğuladı ki, S.Babayeva hətta ötən müddət ərzində mətbuat konfransı keçirərək E.Abdullayevi ittiham etməyə də macal tapıb. “Amma bütün bunlara baxmayaraq Sevinc Babayevanın şübhəli şəxsi qismində saxlanması və sonradan təqsirləndirilən şəxs qismində dindirilməsi üçün hüquq-mühafizə orqanları heç bir cəhd göstərmədi. Bu da sırf yuxarıdan gələn sifarişlə bağlıdır”,- deyə M.Baxışov vurğuladı.
Xəyal
