Misir Mərdanov Məleykə Abbaszadəyə öz işilə məşğul olmağı tövsiyyə etdi
Təhsil naziri Misir Mərdanovun Tələbə Qəbulu Üzrə Dövlət Komitəsinin(TQDK) “Səadət” sarayında keçirilən 20 illik yubileyində iştirak etmədiyi barədə məlumat vermişdik. Həmin məlumatda bildirilirdir ki, təhsil nazirinin tədbirdə görünməməsinin səbəbi ora dəvət edilməməsilə əlaqədardır. TQDK sədri Məleykə Abbaszadə aralarında olan konfliktə görə Misir Mərdanovu qurumun yubiley tədbirinə dəvət etməyib.
Məlumatla bağlı Təhsil Nazirliyinin mövqeyini öyrənmək mümkün olmasa da, dünən TQDK məsələyə aydınlıq gətirib. Qurumdan qəzetimizə bildirilib ki, Misir Mərdanov TQDK-nın yubileyinə dəvət edilib. Lakin naməlum səbəblərdən iştirak etməyib.
Bu arada Misir Mərdanov mətbuatda Məleykə Abbaszadənin “Ilin ən yaxşı müəllimi” və “Ilin ən yaxşı məktəbi” müsabiqələrinin düzgün keçirilmədiyi barədə dediyi fikirlərə etiraz edib. Modern.az saytının məlumatına görə, təhsil nazirinin TQDK sədrinə cavabı bir kəlmədən ibarət olub: “Hər kəs öz işi ilə məşğul olsa yaxşıdır”.
Lakin təhsil naziri bununla da kifayətlənməyib. Qurum bu məsələ ilə bağlı saytı vasitəsilə geniş açıqlama yayıb. Açıqlamada deyilir ki, Məleykə Abbaszadənin fikirlərinin heç bir elmi əsası yoxdur: “Son günlər müxalifət qəzetlərinin səhifələrində ölkə prezidentinin sərəncamı ilə Təhsil Nazirliyi tərəfindən keçirilən ”Ilin ən yaxşı məktəbi” və “Ilin ən yaxşı müəllimi” müsabiqələri ilə bağlı Tələbə Qəbulu üzrə Dövlət Komissiyasının sədri Məleykə Abbaszadənin yanlış, heç bir əsası olmayan və böhtan dolu fikirləri əks olunur. Komissiya sədri bu müsabiqələrin düzgün keçirilmədiyini bildirir və bunu ali məktəblərə qəbul imtahanlarında məzunları yüksək bal toplayan orta məktəblərin “Ilin ən yaxşı məktəbi” müsabiqəsində yer tutmaması ilə əlaqələndirir…
… Məlumat üçün bildiririk ki, ölkənin təhsil mütəxəssisləri, eləcə də, beynəlxalq təhsil ekspertləri orta məktəbin məqsədinin təkcə ali məktəblərə tələbə hazırlamaq olmadığını birmənalı şəkildə təsdiq edirlər. Ancaq buna baxmayaraq TQDK-nın ali məktəblərə qəbul zamanı məzunları yüksək bal toplayan orta məktəblərin siyahısı ilə Təhsil Nazirliyinin keçirdiyi “Ilin ən yaxşı məktəbi” müsabiqəsinin nəticələri Məleykə Abbaszadənin dediklərindən fərqli olaraq, üst-üstə düşür. Məleykə Abbaszadənin sözləri ilə desək, onun fikirlərinin heç bir elmi əsası yoxdur…
…Təəssüf hissi ilə bildiririk ki, Tələbə Qəbulu üzrə Dövlət Komissiyası belə məlumatları jurnalistlərə verməzdən əvvəl bir dövlət qurumu olaraq, Təhsil Nazirliyinə müraciət edib dəqiqləşdirsəydi, ölkə Prezidentinin sərəncamı ilə yekunlaşdırılan bu mühüm müsabiqənin nəticələri ilə bağlı mətbuatda əsassız müzakirələrin aparılmasına səbəb olmazdı”.
Xatırladaq ki, Məleykə Abbaszadə bir neçə gün əvvəl mətbuata açıqlamasında Təhsil Nazirliyinin keçirldiyi “Ilin ən yaxşı müəllimi” və “Ilin ən yaxşı məktəb” müsabiqələrindəki şəffaflığı şübhə altına almışdı.
