Noyabrın 27-si səhər Fələstinin keçmiş lideri Yaser Ərəfatın məzarı açılıb. Onun cəsədindən nümunə götürülərək, zəhərlənib öldürülməsi iddiaları yoxlanacaq. Cəsədi Fransadan olan hakimlərin gözü önündə İsveçrə, Fransa və Rusiyadan olan mütəxəssislər çıxarıb. Meyitdən nümunə götürüləndən sonra bu gün yenidən dəfn olunacaq.
İsveçrəli alimlər Ərəfatın paltarında yüksək miqdarda radioaktiv maddə – Polonyum-210 tapıldığını aşkar etmişdi. Bundan sonra Fransada Ərəfatın ölümü ilə bağlı cinayət işi açılıb.
Ərəfat 2004-cü il noyabrın 11-i 75 yaşında Parisdəki Percy Hərbi Xəstəxanasında vəfat edib. Onu müalicə edən həkimlər xəstəliyinin səbəbini müəyyənləşdirə bilməmişdilər. Fələstində çoxları düşünür ki, Ərəfatı İsrail tərəfi zəhərləyib. İsrail rəsmiləri ittihamları qəbul etmir.
