Hakimiyyətə qarşı Cenevrədəki aksiyanın aparıcısı Surxan Lətifovun əlaqələri arşdırılır
Azərbaycan Avropa Hərəkatının keçmiş prezidenti Surxan Lətifov artıq bir müddətdir ki, Avropada yaşayır. O, 2011 ci ilin oktyabrında Beynəlxalq Avropa Hərəkatının Ermənistanın paytaxtı Yerəvan şəhərində təşkil etdiyi konfransda iştirak etdikdən sonra Azərbaycanı tərk etməyə məcbur olmuşdu.
Hazırda İsveçrədə yaşayan S.Lətifov Azərbaycandakı real vəziyyətin yerli ictimaiyyətin diqqətinə çatdırılması istiqamətində fəal iştirak edir. O, Azərbaycanda insan haqlarının pozulmasına etiraz olaraq keçirilən aksiyaların əsas təşkilatçılarından biridir. S.Lətifov İsveçrənin paytaxtı Berndə və bugünlərdə Cenevrə şəhərində insan haqlarının müdafiəsi və demokratiya tələbi ilə təşkil edilən aksiyalarda aparıcı olub.
Belə görünür ki, S.Lətifovun bu fəallığı Azərbaycan hakimiyyət dairələrini narahat edib. Daxil olan məlumata görə, Cenevrədə SOKAR-nn korrupsiya fəaliyyətinə qarşı təşkil edilən aksiyadan sonra hakimiyyət orqanları onun Bakıda yaşayan yaxın tanışlarından biri ilə əlaqə yardaraq ondan S.Lətifovun əlaqələrini öyərənməyə çalışıb. Ümumiyyətlə Azərbaycan hakimiyyətinin xaricdə ona qarşı aksiyalarda iştirak edən həmvətənlərimizə müxtəlif təsir yolları aradığı sirr deyil və S.Lətifovun əlaqələrini öyrənmək cəhdinin də bu məqsəddən irəli gəldiyi istisna deyil.
Məsələ ilə bağlı qəzetimizə açıqlama verən S.Lətifov bildirib ki, fəaliyyətindən geri çəkilmək niyyəti yoxdur, əksinə tezliklə Azərbaycanda insan haqlarının pozulması, korrupsiya hallarına etiraz və demokratiya tələbi ilə yeni aksiyaların təşkilini planlaşdırırlar. O, hazırda İsveçrədə Azərbaycan hakimiyyətinin anti-demokratik hərəkətlərinə etiraz aksiyalarının təşkilində yaxından iştirak etməklə yanaşı, bu ölkədə status almaq istiqamətində də hüquqi müstəvidə mübarizə apardığını deyib.