AXCP Gənclər Komitəsinin üzvü Dəyanət Babayevin qondarma cinayət işi üzrə şübhəli şəxs qismində saxlanması ilə bağlı bir sıra bəyanatlar verilib.
Müsavat Partiyasının bəyanatında deyilir ki, Dəyanət Babayevə
qarşı cinayət işi onun siyasi fəaliyyəti və aksiyalarda, eləcə də sosial şəbəkələrdə görsətdiyi fəallığa görə açılıb: “Azərbaycan hakimiyyəti siyasi fəalları müxtəlif üsullarla həbs edir. Son dövrlər hakimiyyət aksiyalarda fəallıq göstərən gənclərə qarşı repressiyanı gücləndirib. Azərbaycan iqtidarı bu üsullarla fəal gənclərin gözünü qorxutmağa, onların mübarizə əzmini zəiflətməyə çalışır.
Müsavat Partiyası bəyan edir ki, müxalifət fəallarına qarşı bu cür repressiyalar hakimiyyətin istədiyi effekti verməyəcək. Bu həbslər demokratik düşərgənin demokratiya uğrunda mübarizəsinin qarşısını ala bilməyəcək.
Müsavat Partiyası hakimiyyəti Dəyanət Babayevin azadlığa buraxmağa və müxalif fəallara qarşı təzyiqlərə son qoymağa çağırır”.
Azərbaycan Liberal Partiyası da hesab edir ki, iqtidar Dəyanət Babayevdən onun fəallığına, hakimiyyətin siyasətinə qarşı aktiv etiraz etdiyinə görə qisas alır: “Bu, qisas aksiyası, növbəti siyasi repressiya addımıdır. ALP Dəyanət Babayevin saxlanmasını və ona qarşı saxta cinayət işinin qaldırılmasını qətiyyətlə pisləyir və hakimiyyətdən onun dərhal azad olunmasını tələb edir”.
“AXCP Gənclər Komitəsinin fəalı Dəyanət Babayevin 17 noyabr mitinqindən sonra 7 günlük həbsə məhkum edilməsinin ardınca ona qarşı cinayət işinin başlanması və həbsdən azad edilməməsi hakimiyyətin ictimai fəallara qarşı növbəti repressiyasıdır”.
Bunu da VHP Gənclər Təşkilatı Dəyanət Babayevin həbsi ilə bağlı yaydıqları bəyanatda bildiriblər. Bəyanatda qeyd olunur ki, oğurlanmasına cəhd edilən və şikayətçi qismində polisə müraciət edən şəxsin “ictimai asayişi pozmaq” və “xuliqanlıq” adı ilə həbs olunması təkcə siyasi hakimiyyətin müxalif fikrə dözümsüzlüyünün deyil, həm də ölkənin qanunlarla idarə edilməməsinin, hüquq-mühafizə orqanlarının hakim komandanın əlində qoçu dəstəsinə çevrilməsinin sübutudur: “Hadisə yerindən qaçan Tofiq Səlimov adlı öyrədilmiş şəxsin üzəduranlığı ilə bir gəncin heç bir cinayət törətmədiyi halda həbsi Azərbaycanda insan haqlarının, ifadə azadlığının və demokratiyanın hansı acınacaqlı durumda olduğunu təsdiqləyən faktlardan biridir”.
Bəyanatın sonunda VHP Gənclər Təşkilatı hakimiyyəti bu addımlardan çəkinməyə, vətəndaş qarşıdurmasına və itaətsizliyə, dövlət qurumlarına inamsızlığı səbəb olan mənfi tendensiyanı aradan qaldırmağa səsləyib: “Siyasi hakimiyyətin bu addımları vətəndaş qarşıdurmasını artırmaqla ölkədə vətəndaş-dövlət münasibətlərini inamsızlıq müstəvisinə keçirir və qarşıdurma yaradır. Bu mənfi halların diktatura rejimlərində hansı fəsadlara gətirib çıxardığı göz önündə olduğu bir halda Azərbaycan hakimiyyətinin bu addımları ölkənin gələcəyini çox böyük təhlükəyə atır. Biz VHP Gənclər Təşkilatı olaraq hakimiyyətdən bu yoldan çəkinməyi və Dəyanət Babayevi dərhal azadlığa buraxmasını tələb edirik”.
“NİDA” Vətəndaş Hərəkatı isə baş verənləri D.Babayevin iki qat cəzalandırılması adlandırıb: “17 noyabr 2012-ci ildə Bakı şəhərinin mərkəzində keçirilmiş dinc etiraz aksiyasına polisin zorakı müdaxiləsi nəticəsində həbs edilərək, 7 sutka inzibati həbsə məhkum edilmiş, AXCP üzvü Dəyanət Babayev bu cəzanı çəkdikdən sonra sərbəst buraxılmamış və Nəsimi rayon Polis İdarəsinə aparılaraq, barəsində xuliqanlıq maddəsi ilə cinayət işi açılmışdır.
Bir əmələ görə 2 dəfə cəzalandırmaq kimi insan hüquqlarının kobud pozuntusunu törədən rejim bu dəfə də gəncləri hədəf almış və aksiyaların ən aktiv iştirakçılarından biri barəsində hüquqa zidd olaraq, cinayət işi açmışdır.
N!DA Vətəndaş Hərəkatı olaraq, hesab edirik ki, bu həbs siyasi sifariş əsasında həyata keçirilir, hədəf etirazçıları susdurmaq, demokratik dəyərlər uğrunda mübarizə aparan hər kəsi qorxutmaqdır; ümumi dəyərlər uğrunda mübarizə aparan hər kəs kimi Dəyanət Babayevin də müdafiəsini davam etdirəcəyik”.
Daha bir bəyanatı Siyasi Azadlıqları Müdafiə Alyansı (SAMA) verib. “SAMA son zamanlar müxalif gənc fəalların həbslərinin davam etməsindən narahatlığını ifadə edərək D.Babayevin həbsini pisləyir.
D.Babayev noyabrın 17-də ictimai fəalların Bakıda “Parlament buraxılsın” tələbi ilə keçirdikləri etiraz aksiyanın fəal iştirakçısı olub və buna görə də o həmin gün polis tərəfindən saxlanılıb. D.Babayevə məhkəmə qərarı ilə 7 sutka müddətinə inzibati həbs cəzası verilib. Noyabrın 24-də isə D.Babayevin həbs müddəti başa çatsa da, o sərbəst buraxılmayıb və saxlanıldığı Müvəqqəti Saxlama Təcridxanasından Nəsimi Rayon Polis İdarəsinə (RPİ) aparılıb.
Azərbaycan Respublikası Daxili İşlər Nazirliyinin yaydığı məlumata görə, D.Babayev noyabrın 7-də baş verən insidentə görə saxlanılıb və həmin hadisə ilə bağlı Cinayət Məcəlləsinin 221.2.1-ci (xuliqanlıq) maddəsi ilə cinayət işi qaldırılıb. Nazirlikdən bildirilib ki, o, həmin gün daha iki partiyadaşı Musa Rahim və Elvin Baycanla Bakının Nizami küçəsində Tofiq Səlimov adlı şəxsi təhqir edib, ona yüngül bədən xəsarəti yetirib.
SAMA hesab edir ki, D.Babayevin bu həbsi qanun pozuntuları ilə müşayiət edilib. Belə ki, o Müvəqqəti Saxlama Təcridxanasından çıxarılıb, polis idarəsinə gətirilməsi haqda onun ailə üzvlərinə heç bir məlumat verilməyib və onun həmin müddətdə vəkillə təmin edilməsinə şərait yaradılmayıb. D.Babayev Nəsimi RPİ-də saxlanıldığı halda oranın məhsul polis əməkdaşları gənc fəalın orada olmadığını bildiriblər.
SAMA bəyan edirik ki, D.Babayevin həbsi onun sosial şəbəkələrdə və müxalifətin keçirdiyi etiraz aksiyalarında atkiv fəaliyyəti ilə bağlıdır və siyasi motivlidir.
SAMA D.Babayevin həbsini siyasi hakimiyyətin gənc fəallara qarşı təzyiq və təqiblərin davamı kimi qiymətləndirərək hakimiyyəti gənc fəallara qarşı təzyiq və təqiblərə son qoymağa, həbsdə olan gənc fəalları, o cümlədən D.Babayevi azadlığa buraxmağa çağırır” – deyə bəyanatda bildirilir.
