Rəşid Hacılı: «Elşad Abdullayevin yaydığı videolardakı məqamlar ayrıca cinayət işinin açılmasına imkan verir»
Vidadi Mirkamal: «Elşad Abdullayevin yaydığı videolardakı hər bir epizod üzrə cinayət işi başladılmalıdır»
ABU-nun sabiq rektoru Elşad Abdullayevin yaydığı videolar yalnız onun qardaşı Mahir Abdullayevin işi ilə bağlı ciddi faktları ortaya qoymadı. Elə sonuncu videogörüntüdə Zülfüqarov qardaşlarının 5 milyona azadlığa buraxıldığı, daxili işlər naziri və onun müavini barədə bir sıra maraqlı faktlar açıqlanıb. Bəs bu faktlar ayrıca cinayət işlərinin açılmasına əsas ola bilərmi?
Hüquqşünas Rəşid Hacılı bildirdi ki, E.Abdullayevin G.Əhmədova ilə bağlı yaydığı videodan sonra bir cinayət işi başlandı. R.Hacılı söylədi ki, bu cinayət işinin nə dərəcədə düzgün maddə ilə başlanıldığı ayrıca mövzunun müzakirəsi olsa da, bununla belə E.Abdullayevin açıqladığı digər videolarla bağlı bir araşdırmanın aparıldığına dair məlumat yoxdur: “Qanuna görə, əgər ortada cinayət işinin açılması üçün məlumat varsa, müvafiq qurumlar həmin faktla bağlı araşdırma aparmalıdırlar. Əgər bu məlumatlar cinayət işinin qaldırılması üçün kifayətdirsə, o zaman cinayət işi qaldırılmalıdır. Amma bizdə hələ ki, belə bir araşdırmanın aparıldığına dair məlumatlar yoxdur. Hər halda Elşad Abdullaeyvin yaydığı videolardakı məqamlar ayrıca cinayət işinin açılmasına imkan verir”.
IP Koordinasiya Şurasının üzvü, hüquqşünas Vidadi Mirkamal da bildirdi ki, E.Abdullayevin yaydığı videolar ümumilikdə sistemin cinayətlərini ortaya qoyur və həmin videolardakı faktlara Cinayət Məcəlləsinin bütün maddələrini tətbiq etmək olar. Korrupsiaya və rüşvətə bulaşmış sistemin ölkədə mafioz bir struktur yaratdığını düşünən V.Mirkamal vurğuladı ki, hətta Italiyada mafiya dövlətdən ayrıdır. Ona görə dövlət hər yerə nüfuz etməyə çalışır ki, orada mafiyanın izləri qalmasın: “Amma Azərbaycanda mafiya dövlətin içərisindədir. Bəzən belə fikirlər səslənir ki, Azərbaycanda dövlət orqanlarının himayə etdiyi dəstələr var. Bu belə deyil. Həmin cinayətkar dəstələr himayə olunmur, əksinə dövlətin içərisindədir. Əgər normal istintaq komissiyası olsa, Elşad Abdullayevin yaydığı videolardakı hər bir epizod üzrə cinayət işi başladılmalıdır. Burada bir istiqamət vəzifəli şəxslərlə, bir istiqamət də vəzifə səlahiyyətlərini aşma, rüşvət cinayətləri ilə bağlıdır”.
Hikmət
