Robert Əyyubovun polisləri və mühafizəçiləri döyməsilə ilə bağlı yeni məlumatlar
Ötən saylarımızda prezidentin şəxsi mühafizə xidmətinin rəhbəri general-leytenant Bəylər Əyyubovun qardaşı Robert Əyyubovun növbəti dəfə polisləri döyməsi barədə məlumat vermişdik. Həmin məlumatda deyilirdi ki, hadisə “Malakan bağı” ilə üzbəüz inşa edilən avtodayanacağın qarşısında baş verib.
Robert Əyyubov idarə etdiyi dövlət nömrə nişanı olmayan “BMW X6″ markalı avtomobili dayanacağın qarşısında saxlayıb. Dayanacağın mühafizə xidmətinin, həmçinin ərazidəki Post Patrul Xidmətinin əməkdaşları ondan avtomobili ərazidən götürməyi xahiş ediblər. Robert Əyyubov isə onların bu xahişinə aqressiv münasibət sərgiləyib. Generalın qardaşı oğlu həm mühafizəçiləri, həm də polisləri döyüb. Həmin vaxt Robert Əyyubovla bir yerdə olan dostları da ona dəstək veriblər. Şahidlər deyir ki, generalın qardaşı oğlunun dostları əraziyə 90 NN 061 nömrəli qara rəngli ”Mercedes E Klass” markalı avtomobildə gəliblər. Robert Əyyubov daha sonra silaha əl atıb. Bundan sonra mühafizəçilər və polislər qaçıblar. Generalın qardaşı oğlu isə dostları ilə birgə ərazidən uzaqlaşıblar.
Dünən əldə etdiyimiz məlumatlara görə, hadisə zamanı Robert Əyyubovun dostları gəldikləri maşının açarını itiriblər. Bu baxımdan qara rəngli “Mercedes” orada qalıb. Sonradan avtomobili polislər aparıb. Məlumatlarda həmçinin deyilir ki, mühafizəçilər Robert Əyyubovdan şikayət ediblər. Hazırda Səbayel polisində olayla bağlı araşdırmalar aparılır.
