İran müxalifətinin liderlərindən olan Milli Etimad Partiyasının rəhbəri Mehdi Kərrubi səhhətində yaranan nasazlığa görə xəstəxanada müayinə olunduqdan sonra yenidən ev dustaqlığına qaytarılıb. O, 650 gündən çoxdur ev dustağıdır.
“Media forum” saytının məlumatına görə, Mehdi Kərrubinin oğlu Məhəmmədtağı Kərrubi jurnalistlərə belə deyib: “Atamda başgicəllənmə, ürəkbulanma və iştahasızlıq vardı. Ailəmizin xahişi ilə xəstəxanaya köçürülmüşdü. Həkimlər də onun xəstəxanada müayinə olunmasına təkid etmişdilər. Onu ETTELAAT əməkdaşlarının müşayiəti ilə xəstəxanada bir neçə saat müayinə etdikdən sonra yenidən mənzilə qaytarıblar. Hazırda ailəmizdən bir nəfərin onun yanında qalmasına razılıq veriblər.
Təəssüflər olsun ki, atamın hüquqi statusunun müəyyən edilməməsi tutulduğu ilk gündən indiyə qədər bizə problemlər yaradıb. Hökumət iki ildir atamı həbsdə saxlasa da, onun hüquqi baxımdan vəziyyətini müəyyənləşdirməkdən boyun qaçırır. Bu isə qəbuledilməzdir”.
“Media forum”
