«Xan» Naxçıvanda Quba olaylarının təkrarlanacağından ehtiyat edir
Naxçıvan Muxtar Respulikasının Ali Məclis sədri Vasif Talıbovun internetə qadağa qoyması barədə yeni məlumatlar əldə etmişik. Xatırladaq ki, Vasif Talıbovun göstərişilə səhər saat 08:00-dan 14:00-a qədər və axşam saat 21:00-dan sonra məktəblilərin internet-klublara buraxılmasına qadağa qoyulub. Göstərilən zaman ərzində məktəblilər internet-klublarda yaxalanarsa, cərimələnə bilər.
“Azadlıq”a daxil olan xəbərlərdə deyilir ki, Vasif Talıbovun internetə qadağa qoyması Muxtar Respublikada Quba olaylarının təkrarlana biləcəyi barədə narahatlıqdan irəli gəlir. Bir neçə gün əvvəl Naxçıvanda üsyana çağırış vərəqələrinin yayılması Muxtar Respublika rəhbərliyini təşvişə salıb. Hələ də bu vərəqələrin kimlər tərəfindən yayıldığı bəlli deyil. Hər halda indiyə qədər bu barədə heç bir məlumat verilməyib. Naxçıvan rəhbərliyi hesab edir ki, vərəqələri yayan qüvvələr internetin imkanlarından istifadə edib Qubada olduğu kimi Muxtar Respublikada da qarışıqlıq yarada bilərlər.
