Cəlilabad sakinləri komitə sədrini rayona ayrılan pulu mənimsəməkdə ittiham edir
Ötən il Ilham Əliyev tərəfindən Cəlilabad rayonunda abadlıq işlərinin aparılması ilə bağlı ayrılan 4 milyon manat vəsait təyinatı üzrə düzgün xərclənməyib. Bunu bir qrup Cəlilabad sakini “Azpolitika.info”ya ünvanladığı şikayət məktubunda bildirib.
Rayonda hər bir şeyin Dövlət Əmlak Komitəsinin sədri Kərəm Həsənovun nəzarətində olduğunu bildirən şikayətçilərin başlıca narazılığı da elə bu vəzifəli şəxs barəsindədir:
“Prezidentin Ehtiyat Fondundan ayrılan vəsait Cəlilabad rayonunun inzibati ərazisinə aid olan Qarazəncir-Bayxanlı kəndləri arasında olan yolun təmiri ücün nəzərdə tutlmuşdu. Ancaq Kərəm Həsənovun müdaxiləsindən sonra, təmir Cəlilabad-Sadaxlı marşrutu ilə əvəz olundu. Ikinci yolun təmirə o qədər də ehtiyacı yox idi. Sadəcə, Sadaxlı kəndində Kərəm Həsənovun dayısı yaşadığı səbəbindən təmir işləri bu istiqamətdə aparılmağa başlandı”.
Şikayətdə deyilir ki, bir neçə il bundan əvvəl Qarazəncir-Bayxanlı yolu deputatlığa namizədliyi irəli sürülən sabiq Iqtisadi Inkişaf naziri Fərhad Əliyevin qardaşı Əlövsət Əliyev tərəfindən təmir edilirdi, lakin məlum səbəblərə görə iş yarımçıq qaldı: “Bu barədə rayondan prezidentin saytına, onun Administrasiyasına coxlu sayda şikayətlər edildi. Dediyimiz kəndlərin qış aylarında rayon mərkəzi ilə tamamilə əlaqəsi kəsilir. Inanın ki, ciddi bir xəstə olanda onu həkimə çatdırmaq da mümkün olmur. Edilən şikayətlərdən sonra, yolun təmirinə iki briqada cəlb edildi. Dedilər ki, yol bu ilin noyabr ayında istifadəyə veriləcək. Köhnə yolu qazmağa başladılar. Inanın ki, əvvəl vəziyyət indikindən qat-qat yaxşıydı. Indi yağan yağışlardan sonra qazılan yolda yaranan palçıqdan keçmək mümkün deyil. Rayonda müraciət etdiyimiz bütün səlahiyyətli şəxslər bildirir ki, texnikanın Sadaqlıya aparılması Kərəm Həsənovun icra başçısına verdiyi göstərişdən sonra mümkün olub. Bir sözlə, hazırda çox acınacaqlı durumdayıq. Ölkə başçısının ayırdığı vəsaitin təyinatı üzrə xərclənməməsi səbəbindən biz belə bir vəziyyətə düşmüşük. Sizdən xahiş edirik bizim səsimizi yuxarı instansiyalara çatdırın” Şikayətdə bir fakt da qeyd olunur ki, Cəlilabadda aparılan yol təmiri zamanı asfalt Bakıdan daşınır: “Rayonda böyük asfalt zavod var, sadəcə kimlərinsə marağını təmin etmədiyi səbəbindən onun fəaliyyətinə icazə verilmir. Bakıdan asfaltın daşınması isə onun keyfiyyətini tamamilə aşağı salır. Bu da o səbəbdən edilir ki, həmin asfalt zavodu da Kərəm Həsənova yaxın adamlara məxsusdur”.
