Xalq artisti Brilliant Dadaşova Azərbaycan müğənniləri üçün əlçatmaz olan mükafata layiq görüləcək. Sənətkarın mətbuat xidmətindən ANS PRESS-ə verilən məlumatına görə, Nyu-Yorkun məşhur konsert salonlarının biri olan “Millenium”da “Big Apple Music Awards” mükafatının beşinci beynəlxalq təqdimetmə mərasimi keçiriləcək. 2 dekabrda baş tutacaq mərasim özünəməxsusluğu ilə məşhur “European Music Awards”, “Latina Music Awards” mükafatlarının analoqudur.
Təqdimatda artistlər cəmi 22 nominasiyada mükafatlandırılacaqlar. Hansı musiqiçinin mükafatlandırılması isə mükafatın təşkilatçılıq komitəsinin çiynindədir. Onlar mərasimə şərq musiqi mədəniyyətinin inkişafında həqiqətən böyük zəhməti olanları dəvət ediblər.
BBC daxil olmaqla bütün dünyadan 15 telekanal öz efirlərində bu şounu yayımlayacaqlar.
Artıq hal – hazırda səviyyəli və xüsusi “Diamond Award” mükafatının sahibinin adı bəllidir. Bu – bizim həmvətənlimiz Brilliant Dadaşovadır.
“Big Apple Music” mükafatının bu nominasiyasında əvvəlki illərdə sahibləri Alabina və İbrahim Tatlısəs olub.
