Azərbaycan İslam Partiyası və Həbs edilmiş islamçıların hüquqlarını Müdafiə Komitəsi hüquq müdafiəçiləri Novella Cəfəroğluya, Səidə Qocamanlıya, Səadət Bənənyarlıya və Müsavat Partiyasının başqanı İsa Qəmbərə müraciət edib. “FaktXeber.com”un yaydığı məlumata görə, müraciətdə hüquq müdafiəçilərindən AŞPA Baş Katibinin müavini Qabriela Battaini-Draqoni və AŞPA-nın siyasi məhbuslar problemi üzrə xüsusi məruzəçisi Kristofer Ştrasserə ünvanlanacaq məktubun imzalanması xahiş olunur.
Müraciətdə deyilir:
“Biz əminik ki, Sizlər də Azərbaycanda həqiqi demokratik, hüquqi dövlətin qurulması ideyasını müdafiə edirsiniz. İnanmaq istərdik və inanırıq ki, Sizlər heç zaman Azərbaycan İslam Partiyasına və ümumilikdə islamçılara qarşı irəli sürülən saxta, şər və böhtan dolu ittihamları, islamçıların dövlət əleyhinə olmaları iddialarını qəbul etmir, siyasi sifariş əsasında çıxarılan saxta məhkəmə hökmlərini ədalətsiz sayırsınız.
Siz, insan haqları və hüquqlarının müdafiəçisi kimi şərəfli, məsul bir işi üzərinizə götürmüşünüz. İnanırıq ki, Azərbaycanda qanunun aliliyi uğrunda mübariz insanlar olduğunuzu bir daha bütün cəmiyyətə sübutu kimi aşağıda adları çəkilən islamçıları –
1. Abbasov Fəramiz
2. Axundzadə Ruhulla
3. Abdullayev Vaqif
4. İlyasov Fəxri
5. Məmmədyarov Firdovsi
6. Səmədov Dəyanət
7. Səmədov Mövsüm
8. Cəbiyev Azər
Səid Dadaşbəylinin qrupu:
1. Ağayev Fərid Nadir oğlu
2. Əliyev Ceyhun Saleh oğlu
3. Əliyev Rəşad İsmayıl oğlu
4. Dadaşbəyli Səid Ələkbər oğlu
5. Qocayev Samir Edik oğlu
6. Quliyev Bəybala Yəhya oğlu
7. İdrisov Mikayıl Qərib oğlu
8. Kərimov Rasim Rafiq oğlu
9. Kərimov Cahangir Ramiz oğlu
10. Mehbalıyev Emin Nurəddin oğlunu
həqiqətən siyasi məhbus kimi tanıyacaq, islamçıların siyasi sifariş əsasında saxta ittihamlarla həbs olunmalarını təsdiqləyəcək, siyahının AŞPA-nın yekun qətnaməsinə salınmasını müdafiə edəcək və AŞPA Baş Katibinin müavini xanım Qabriela Battaini-Draqoni və AŞPA-nın siyasi məhbuslar problemi üzrə xüsusi məruzəçisi cənab Kristofer Ştrasserə ünvanlanacaq məktubu imzalayacaqsınız.
Biz eyni zamanda Müsavat Partiyasının hörmətli başqanı İsa Qəmbərin, “Müsavatın “Divan” üzvlərinin əleyhinə çıxmaq, birbaşa partiya əleyhinə çıxmaqdır” kimi fikirlərinə də sayğı ilə yanaşırıq. Həmçinin inanırıq ki, İsa bəy də AİP sədri Mövsüm Səmədov başda olmaqla islamçıların siyasi repressiya qurbanları olduğuna, onların saxta ittihamlarla, siyasi sifariş əsasında həbsdə yatmalarına inanır. Onun islamçıların tezliklə azad edilməsi üçün zəruri qərarların qəbulunda ədalətli mövqe tutacağına da ümidvarıq. Müsavatçılar hər zaman siyasi repressiyalara məruz qaldıqları zaman islamçılar tərəfindən müdafiə olunduqları kimi, bizim siyasi məhbuslarımızı da layiqlə müdafiə edəcəklərinə inamımız sonsuzdur”.
Müraciəti AİP-in sədr əvəzi Elçin Manafov və Müdafiə Komitəsinin sədri Natiq Kərimov imzalayıblar.
