Əli Kərimli: “Sizin ailənin bu fədakarlığı hədər getməyəcək, həyatınızı həsr etdiyiniz yolda neçə-neçə nəslə örnək olacaq”
Noyabrın 18-də AXCP rəhbərliyi siyasi məhbus Nigar Yaqublunun ailəsinə baş çəkib. Görüşdə AXCP sədri Əli Kərimli, AXCP Ali Məclisinin sədri Həsən Kərimov, sədr müavini Gözəl Bayramlı, Rəyasət Heyətinin üzvləri Rövşən Quliyev və İlham Hüseynli iştirak edib.
Söhbət zamanı Əli Kərimli Yaqublular ailəsinə bütün cəbhəçilər və onlara ilk gündən dəstəyini ifadə edən cəmiyyət adından minnətdarlığını bildirib. Ə. Kərimli deyib ki, böyük dəyərlərin qorunub saxlanmasına daha çox ehtiyac duyulduğu bir zamanda Yaqublular ailəsi əsl bir nümunə göstərdi. Bu, çevrədəki insanlara ləyaqət və ədalət uğrunda gedən mübarizədə sonadək qətiyyətlə və mərd-mərdanə dayanmağın örnəyini yaratmaq nümunəsi idi. “Bizim insanlar yaxşını yamandan incəliklə ayıran, ləyaqətli insanların dəyərini bilən insanlardır. Nigarla bağlı baş verən hadisənin ilk günündən cəmiyyətin hadisəyə reaksiyası, böyük çoxluğun birmənalı olaraq Nigarın yanında olması da bundan xəbər verir. İndi hər kəs görür ki, bu hakimiyyətin məqsədi milli dəyərləri tapdamaq bahasına olsa belə, Yaqublular ailəsindən qisas almağa yönəlib. Tarixdə heç nə unudulmur və qiymətsiz qalmır. Bizim əqidə dostumuz Tofiq bəy həyatın hər üzünü görmüş, Qarabağda döyüşmüş bir insandır. Nigar və Nərgiz kimi övladlar böyütmüş Maya xanım ləyaqətli bir Azərbaycan anasının simvoludur. İnanın ki, sizin ailənin bu fədakarlığı hədər getməyəcək. Bu nümunə sizin həyatınızı həsr etdiyiniz yolda neçə-neçə nəslə örnək olacaq və bu fədakarlığın bəhrəsini sizin övladlarınız doyunca görəcəklər”, – deyə Ə. Kərimli bildirib.
AXCP-yə, Əli bəyə və “Azadlıq” qəzetinə minnətdarlığını bildirən Tofiq Yaqublu ilk gündən onların xüsusi dəstəyini hiss etdiyini söyləyib. “Bu, ailəmiz üçün böyük bir dəstəkdir. Biz məhz arxamızda belə insanları gördüyümüzə görə güclü dayana bildik. Bu doğmalığı, bu birliyi mübarizəmizin sonuna kimi qoruyub saxlamaq hamımız üçün bir borcdur” – deyə T. Yaqublu ailələri adından Nigara dəstək verən hər kəsə təşəkkürünü çatdırıb.
Səmimi söhbət çay süfrəsi arxasında davam edib.
