Noyabrın 17-də Bakının mərkəzində «saxta parlament buraxılsın» şüarı ilə keçirilən etiraz aksiyasına beynəlxalq mətbuat da ciddi diqqət ayırıb. Tanınmış beynəlxalq informasiya agentlikləri aksiya barədə məlumatı öz xəbər buraxılışlarına yerləşdiriblər.
Məsələn, «Frans Press Agentliyi» Bakıdakı aksiyanı bu cür təsvir edib: «Ötən gün müxalifət tərafdarları Bakının mərkəzində “Fantanlar Bağı” ətrafında toplaşaraq, «azadlıq» şüarları səsləndiriblər. Onlar parlamentin buraxılmasın tələb edib. Azərbaycan polisi demokratik qüvvələrin Bakının mərkəzində keçirdiyi aksiyanı zorakılıqla dağıdaraq, onlarla fəalı həbs edib. Aksiya nəticəsində ən azı iki jurnalist xüsusi fərqlənmə jiletlərini geyinmələrinə baxmayaraq, polis tərəfindən döyülüb». Hazırlanan reportajda «Frans Press Agentliyi»nin əməkdaşı AXCP sədri Əli Kərimlinin də aksiya ilə bağlı fikirlərinə yer verib: «Hakimiyyət növbəti dəfə insanların Konstutsiyada təsbit olunan sərbəst toplaşmaq hüququnu kobud şəkildə pozdu. Amma bununla belə polis saxta parlamentin buraxılması tələbini ortaya qoyan cəsur vətəndaşların səsini boğa bilmədilər», deyə müxalifət partiyası olan Xalq Cəbhəsinin lideri Əli Kərimli vurğulayıb».
Agentlik daha sonra Azərbaycan haqqında məlumat verməklə ölkədəki siyasi situasiyanı və hakim rejimin mahiyyətini şərh edib: «Neftlə zəngin olan Azərbaycanda 17 noyabr aksiyası parlamentin icazəsiz mitinqlərdə həbs olunanlara qarşı cərimələrin artırılması barədə qərar qəbul etdikdən sonra keçirilən ilk tədbirdir. Parlament dəyişikliklər edərkən bununla bağlı keçirilən aksiyada 30 nəfər saxlanılmışdı. Bundan əvvəl isə ölkədəki rüşvət və korrupsiyaya qarşı keçirilən aksiyada da onlarla müxalifət fəalı həbs olunmuşdu. Azərbaycanda «Eurovision» yarışması zamanı da ölkədə insan haqlarının pozulmasına diqqəti cəlb etmək üçün müxalifətin təşkil etdiyi aksiyalarda yenə polis zorakılığı və həbslər müşahidə olunmuşdu. Ümumiyyətlə zorakılığa meyilli Əliyev rejimi artıq uzun müddətdir ki, insan haqlarının pozulmasında və müxalif fikri boğmaqda ittiham olunur».
Amerikanın tanınmış «United Press International» saytı isə 17 noyabr aksiyasını «Bakıdakı aksiyaçılar parlamentin buraxılmasın tələb edir» başlığı ilə verib: «Bakıda müxalifət partiyaları Xalq Cəbhəsi və Müsavat tərəfindən keçirilən izdihamlı aksiyada 20 nəfər saxlanılıb. Hökuməti istefaya çağıran mitinqçilər, parlamentin buraxılmasını da tələb edir. Müxalifətin bu istiqamətdə aksiyaları keçən aydan başlayıb. Aksiyaların bahdamasına isə parlamentdəki deputat yerlərinin 1 milyona satılması barədə qalmaqalı video səbəb olub.
azadliq.info
