Səlim Müslümovla Tağı Əhmədov hakim partiyasının tədbirində niyə mübahisə edib?
Deputat Qüdrət Həsənquliyev siyasi partiyalarla bağlı yeni qadağaları nəzərdə tutan qanun layihəsini mənfi qiymətləndirib. O, “Mediaforum”a müsahibəsində bu məsələ barədə danışarkən hakim Yeni Azərbaycan Partiyasının da ifşa edib:
“Layihədə siyasi partiyaya daxil olmağa və ya onun üzvlüyündə qalmağa məcbur etməyə görə iri məbləğdə cərimə və ya azadlıqdan məhrumetmə cəzası nəzərdə tutulur. Hesab edirəm ki, bu düzəlişlər qəbul olunandan sonra hökumət ondan müxalifət partiyalarına qarşı basqı kimi istifadə edəcək, yeni müddəalardan yalnız bu məqsədlə istifadə olunacaq. Bəzi öyrədilmiş, qərəzli adamlar, yaxud da siyasi baxımdan yetkin olmayan insanlar məqsədyönlü şəkildə müxtəlif partiyalara daxil olacaqlar, sonra da guya onlara təzyiq edildiyi, partiyaya təzyiq altında üzv keçdikləri haqda bəyanat verəcəklər. Bu isə ayrı-ayrı siyasi partiyaların basqı altında saxlanmasına, cinayət qaydasında təqib olunmasına imkan verəcək…
…Əslində, bu müddəalar qəbul olunandan sonra onların tətbiqi normal aparılarsa və Azərbaycanda hüquq mühafizə orqanları tamamilə azad, müstəqil olarsa, onda bu yeni müddəaların təsiri altına daha çox iqtidar düşər, bundan iqtidar ziyan çəkər. Bir müddət əvvəl Yeni Azərbaycan Partiyasının Yasamal rayon təşkilatının toplantısı olmuşdu və mətbuat həmin iclasdan geniş reportajlar yaymışdı. Iclasda Bakı Metropoliteninin rəhbərliyi ilə Dövlət Sosial Müdafiə Fondunun rəhbərliyi arasında böyük mübahisə baş verib. Mübahisə Dövlət Sosial Müdafiə Fondunda neçə işçinin çalışması və onlardan neçəsinin YAP üzvü olması, yəni fondda YAP-çıların sayının az olması istiqamətində gedib. Real vəziyyət belə olduğu halda təklif olunan əlavə və dəyişikliklər nəyə lazımdır?”.
