Vəfa Quluzadə: «Doroxin səfəri xüsusi xidmət orqanlarının nəzarəti altında olmalı idi»
Rusiyada «Sadval» ləzgi hərəkatının bərpa olunması ilə bağlı məlumatlar mətbuatda yer alandan qısa müddət sonra bu ölkənin Bakıdakı səfirinin Azərbaycanın şimal rayonlarına səfər etdiyi barədə xəbərlər yayıldı. «Yeni Müsavat» qəzetinin yazdığına görə, noyabrın 13-də Rusiyanın Azərbaycandakı səfiri Vladimir Doroxin 12 nəfərlik nümayəndə heyəti ilə Zaqatalaya səfər edib və orada Balakən rayon sakini, əvvəllər “Avar” cəmiyyətinin sədri olmuş Məmməd İsayev, Zaqatalada yaşayan, milliyyətcə saxur olan Mübariz İsmayılov, Dağıstanda nəşr olunan və Azərbaycana qarşı yazıları ilə ad çıxarmış “Nur” qəzetinin əməkdaşı Şərif Şamxalov, rayon və bölgə səviyyəli ictimai tədbirlərdə xüsusi fəallıq göstərən və separatçı kimi tanınan, milliyyətcə avar Əyyub Canqayevlə görüşüb.
Bu iki hadisənin bir biri ilə əlaqəli olması şühbə doğurmur. Artıq Kremlin ölkəmizdə etnik münaqişə hazırdandığı ehtimalları da güclənir. Səfirin şimal rayonlarına səfəri də bu planın tərkib hissəsi kimi izah olunur.
Qeyd edək ki, ötən ay Moskvada “Rusiya və Azərbaycanda yaşayan ləzgi, avar xalqlarının problemləri və onların həlli yolları” adlı I beynəlxalq konfrans keçirilib və həmin konfransda Moskvada fəaliyyət göstərən ləzgi və avar cəmiyyətlərinin rəhbərləri, fəalları, erməni və ermənipərəst rus ziyalıları Azərbaycanda ləzgilərin, avarların hüquqlarının pozulduğunu iddia etməklə yanaşı, onlara müəyyən çərçivədə muxtariyyət verilməli olduğu tələbini irəli sürüblər. Tədbirdə Rusiya rəhbər orqanlarında çalışan şəxslər də iştirak edib və bu, ssenarinin birbaşa Kremldə hazırlandığını deməyə əsas verir.
Azərbaycan Xarici İşlər Nazirliyi Rusiya səfirinin müammalı səfəri ilə bağlı heç bir açıqlama yaymayıb. Baxmayaraq ki, artıq mətbuatda bu məsələ müzakirə olunmaqdadır. Rəsmi Bakı məsələyə necə münasibət göstərməli və hansı addımlar atmalıdır?
Xarici İşlər Nazirliyinin mətbuat xidmətinin rəhbəri Elman Abdullayev “Azadlıq”ın sorğusuna cavab olaraq səfərlə bağlı yayılan məlumatları araşdıracaqlarını və bundan sonra hər hansı bir açıqlama verə biləcəklərini deyib.
Politoloq Vəfa Quluzadə isə hesab edir ki, Rusiya səfiri Xarici İşlər Nazirliyinə dəvət edilməli və ondan izahat tələb olunmalıdır. Çünki səfirin belə bir addım özbaşına ola bilməz.
Rusiyanın Azərbaycanla heç vaxt hesablaşmadığını deyən ekspertin sözlərinə görə, Doroxin səfəri xüsusi xidmət orqanlarının nəzarəti altında olmalıydı: «Xüsusi xidmət orqanları nəzarət etməli, səfirin hara gelib, kiminlə görüşdüyünü bilməli idi. Rusiya kimi daima bizdə gözü, təmannası, iddiaları olan bir ölkənin səfiri sözsüz ki, nəzarət altında olmalıdır. Xarici İşlər Nazirliyində ondan izahat alınmalıdır. Nəzərə almaq lazımdır ki, Rusiya Azərbaycanla hesablaşmır və istədiyini edir».
Ekspert səfirlərin səfəri ilə bağlı Xarici İşlər Nazirliyində qaydaların olduğunu da qeyd etdi. Belə ki, ölkələr arasında müxtəlif razılıqlar olur. Bəzi ölkələrdə səfirlər Xarici İşlər Nazirliyini məlumatlaşdırmamış belə səfərlər edə bilməzlər.
Fizzə