Söz azadlığını boğan Anar Məmmədovun ABŞ-dakı “demokratlığı”
Noyabrın 5-dən “Azadlıq” qəzetinin bank hesabı həbsdədir. Səbəbkar isə qəzeti məhkəməyə verib 4 min manat cərimələtdirən nəqliyyat naziri Ziya Məmmədovun oğlu, “ZQAN” Holdinqin rəhbəri Anar Məmmədovdur. Günlərdir ölkənin fəal ictimaiyyəti “Azadlıq”ın durumundan danışır və çıxış yollarını müzakirə edir. Azad mətbuatı çıxılmaz vəziyyətdə qoyan nazir oğlu isə demokratiyanın beşiyi sayılan, azad sözün təminatçısı olan bir dövlətin paytaxtında – Vaşinqtonda görüşlər keçirir, ziyafət təşkil edir.
“Turan”ın məlumatına görə, Anar Məmmədov noyabrın 14-də Vaşinqtonda 300-dən çox qonağın iştirakı ilə şam yeməyi təşkil edib. Ziyafət iştirakçıları əsasən keçmiş və fəaliyyətdə olan məmurlar, Azərbaycan hökumətinə loyal olan şəxslərdir. Tədbirlə bağlı yayılan məlumatda deyilir ki, Vaşinqtonda Bakıdan olan dostlarla gecə keçirmək Azərbaycan mədəniyyətinin qeyd olunmasıdır. Maraqlıdır ki, təşkilatçılar bir neçə müstəqil analitik və blogeri tədbirə dəvət etməkdən imtina ediblər. Keçmiş lobbiçilərdən biri “Turan”ın Vaşinqton müxbiri ilə söhbətindən bildirib ki, bu cür PR kampaniyaların milli maraqlara zidd olması və bir ailəyə xidmət etməsi çox pisdir. Bakının peşəkar lobbiçilərdən imtina etməsinin səbəbləri ilə bağlı sualın cavabında isə sözügedən mənbə deyib ki, Vaşinqtonda lobbiçilər qarışıq reputasiyaya malikdir: “Bəzən onlar sosial müştərilərin adlarından çıxış edirlər və onların maraqları çox vaxt ictimai maraqlara zidd olur. Eyni zamanda “ərəb baharı” lobbiçilər üçün “qara sınaq”oldu. Belə ki, onların bəzisi demokratik etirazlar fonunda mütərəqqi qüvvələri dəstəklədi, eyni zamanda başqaları sadəcə əvvəlki müştərilərini “satdılar”.
ABŞ-da fəaliyyət göstərən “AZAD” ictimai təşkilatının sədri Elmar Şahtaxtinski isə hesab edir ki, azərbaycanlı oliqarxların “mədəni missiya”, “lobbiləşdirmə” adı altında milyonlarla vəsait xərcləyərək öz övladlarını ABŞ-a göndərməsinin üç səbəbi var: “Birincisi, bu, öz liderlərinə sadiqliyin, öz diktatorlarının barəsində yaxşı imicin formalaşması ideyasına necə xidmət etdiklərinin nümayişidir. İkincisi, bu tədbirlərin köməyilə onlar öz təhlükəsizlik gələcəklərini təmin edirlər və əgər diktatura devrilərsə, harada yaşaya və işləyə biləcəkləri yerlərdə dostlar axtarıb tapırlar. Üçüncüsü, daxili ictimaiyyətə göstərirlər ki, azərbaycanlı vətəndaşlardan mənimsədikləri vəsait “faydalı işə” – Azərbaycanın, Qarabağın və s. təbliğinə sərf olunur. Bu da bir növ piar-kampaniya vasitəsilə pulların yuyulmasıdır. Əslində bu pullar bir ailənin reklamına sərf olunur, qalanı mifdir. Bu pullara Vaşinqtonda ala biləcəkləri yeganə şey ikinci dərəcəli ekspertlərin yaxşı məqalələridir. İstənilən müstəqil siyasətçi və alim çirkli pullardan uzaq durur”.
RATİ sədri Emin Hüseynov hesab edir ki, Azərbaycanın fəal ictimaiyyəti Anar Məmmədovun bu tip tədbirlərinə qatılan qonaqlara mütləq xəbərdarlıq göndərməlidir: “Həmin adamlara demək lazımdır ki, Anar Məmmədov öz ölkəsində azad mətbuatı boğan bir adamdır. Əgər Amerikada bilsələr ki, nazir oğlu mətbuatı məhkəməyə verib cərimələtdirib ən azı, ictimai qınağa görə onun tədbirlərinə qatılmayacaqlar”.
E.Hüseynov hesab edir ki, A.Məmmədov və bu kateqoriyadan olan insanlara viza sanksiyalarının tətbiqini tələb etməklə iş bitmir. Çünki Azərbaycandakı məmurların və onların övladlarının bir çoxu hansısa Avropa ölkəsinin vətəndaşıdır və həmin ölkənin pasportundan istifadə edirlər: “Anar Məmmədov tipli adamların Avropaya, ABŞ-a, demokratik dövlətlərə girişini qadağan etmək lazımdır. Üstəlik bu şəxslərin həmin ölkələrdə mülkiyyət əldə etməsinin, bank hesabları açmasının qarşısını almaq lazımdır. Bunun üçün də Azərbaycanın vətəndaş cəmiyyəti demokratik dünyanı məlumatlandırmalıdır”.
E.Hüseynov onu da bildirib ki, Obama Administrasiyası ABŞ-dakı lobbiçilik fəaliyyətini müsbət qarşılamır və Birləşmiş Ştatların prezidenti bununla bağlı sərt mövqeyini hələ ilk dəfə prezident seçilərkən açıqlayıb: “Hesab edirəm ki, ABŞ-ın ciddi siyasətçiləri bu tədbirə qatılmayıblar. Çünki onlar da ABŞ hökumətinin lobbiçilik cəhdlərinə münasibətindən xəbərdardılar. ABŞ-da məsələn, Konqres binası kimi bəzi inzibati binalar var ki, orada gün ərzində bəlkə 50 furşet keçirilir. İşi-gücü olmayanlar gəlib o furşetlərdə yeyib-içirlər, ad da olur ki, kimsə lobbiçilik edir. İkincisi, sual yaranır, Anar Məmmədovun pulu hardandır ki, Vaşinqtonda tədbir keçirilir?”.
