«Bizim Yol»un ifşa etdiyi cinayətkar dəstə əməkdaşlarımızın həyatına təhlükə yaradıb
Aygün Əliyevanın həbsi ilə Vüsal Yusuboun həyatına sui-qəsd olayı arasında hansı bağlılıqlar var?
Bir ilə yaxındır Abşeron rayon Məhkəməsinin barəsində həbs qətimkan tədbiri seçdiyi Aygün Əliyeva “Bizim Yol” qəzetinin onun dələduzluq əməlləri ilə bağlı bir ay yarım ərzində yazdıqlarından sonra saxlanıldı. Bu işdə zərərçəkənlər qadını Abşeron rayon Polis Şöbəsinin rəis müavini Famil Kərimovun, Daxili İşlər Nazirliyinin Daxili Təhqiqatlar İdarəsinin əməkdaşı Vahid İmanovun, onun oğlu DYP işçisi Anar İmanov, Ağır Cinayətlərə Dair İşlər üzrə Məhkəmənin hakimi Mirzə Xankişiyevin himayə etdiyini deyirdilər.
Rəis müavini A.Əliyeva ilə əlaqəsini inkar edir, bəs faktlar nə deyir?
Famil Kərimov seyid nəvəsi olduğuna deyərək bu fikirləri yaxına buraxmadı. O, qəzetimizin A.Əliyevanın tapılması üçün hansı işlərin aparıldığını və nə vaxt saxlanılacağı sualına: “Allahın köməkliyi ilə tapacağıq” deyərək yenə mücərrəd cavab verdi. Aygün Əliyeva axtarışda olduğu müddətdə onun şəkili Abşeron rayon Polis Şöbəsinin qarşısında axtarılan şəxslərin içərisində olmadı. Famil Kərimov “bu işlərə baxmıram” deyərək yenə A. Əliyevanı himayə etməsi ilə bağlı deyilənləri inkar etdi. Zərərçəkənlərdən R. Hüseynovanın əlində Famil Kərimovla Aygün Əliyevanın telefon danışıqlarının və mesajlarının stenoqramı olsa da, rəis müavini yenə dələduzluqda ittiham olunan qadınla heç bir əlaqəsinin olmadığını dedi. Amma A. Əliyeva bu ilin 8 martında (qeyd: həmin müddətdə axtarışda olub) evinə gül çələngi gətirilərkən həmin vaxt evində olan A. Quluzadəyə (qeyd: daha sonra o, zərərçəkən olub) deyib ki, onu Abşeron rayon Polis Şöbəsinin rəis müavini göndərib. Zərərçəkənlər aydınlaşdırıblar ki, A. Əliyeva Famil Kərimov üçün Bakı şəhəri, Moskva küçəsi 3007 məhəllədə yerləşən yeni tikilmiş “Tac Mahal” adlandırılan evin B blokunun 5-ci mərtəbəsində 2 otaqlı, 87 saylı mənzili hədiyyə alıb, təmir etdirib. Bu günə qədər də həmin binanın komendantı təsdiq edir ki, evi A. Əliyeva alıb və mənzilin bütün kommunal xərclərini qadın ödəyir. Zərərçəkənlərdən R. Bayramova Abşeron rayon Polis Şöbəsinin rəisinə A. Əliyevadan necə ziyan çəkdiyini anladarkən Famil Kərimov məsum bir qadına şər atıldığını deyib. Aygün Əliyeva saxlanılandan sonra Famil Kərimov qəzetimizə ”Həyatıma nifrət etdim” kəliməsi ilə yekun münasibətini bildirdi.
DİN əməkdaşı cavab vermir, 80 minlik “Porsche” isə çox mətləblərə aydınlıq gətirə bilər
A. Əliyevanı himayə edənlər siyahısında Daxili İşlər Nazirliyinin Daxili Təhqiqatlar İdarəsinin əməkdaşı Vahid İmanovun da adı var. Biz onunla A. Əliyeva axtarışda olduğu müddətdə əlaqə saxlaya bilmədik. V. İmanov həmin vaxt məzuniyyətdə oldu. Daxili İşlər Nazirliyinin mətbuat xidmətindən dedilər ki, “Vahid İmanov stajlı işçilərimizdəndir, hansısa dələduzu himayə etməz”.
Amma A. Əliyevanın aldadaraq zərərçəkən Azər Quluzadənin əlindən aldığı 80 min manat dəyərində olan “Porsche” markalı maşını Vahid İmanovun DYP-də işləyən oğlu Anar İmanov idarə edib. (hazırda da həmin maşının A. İmanovda olduğu deyilir) “Porsche” markalı maşını A. Əliyeva mağaza qarşılığında A. Quluzadədən “alıb”, amma həmin mağazanı 3 nəfərə ayrı-ayrılıqda satıb. Bu ilin martında A. Əliyeva həmin maşını Bəhruz Əliyevin adına rəsmiləşdirərək banka girov qoyub və 20 min dollar pul götürüb. Daha sonra banka pulunu ödəməyib. B. Əliyev A.Əliyevadan şikayətçi olduqda Anar İmanov zərərçəkəni hədələyib. “Bir dəfə Aygünlə Anar İmanovu bir yerdə maşında görmüşəm. 4 ay əvvəl polisə yazmışam ki, maşın məndə deyil. Anar dedi ki, bank batıb, onsuz da pul ödənməyəcək. Daha sonra məni hədələdi, dedim get nə eləyirsən elə”- Bəhruz Əliyev qəzetimizə deyib. Daha sonra A. Əliyevanın evində axtarış aparılanda Anar İmanovun xidməti maşını evin həyətində tapılıb. Zərərçəkənlər bildiriblər ki, A. İmanovla A. Əliyeva hər zaman “Porsche” markalı maşında bir yerdə getdiklərindən heç bir polis əməkdaşı DYP işçisinin maşınını saxlamağa cürət eləməyib.
Aygünü himayə etməkdə suçlanan hakimin özü yol verdiyi qanunsuzlqları açıb
Dələduzluqda ittiham olunan qadından rüşvət almaqda və ondan zərər çəkənləri “yola gətirməkdə” ittiham olunan Ağır Cinayətlərə Dair İşlər üzrə Məhkəmənin hakimi Mirzə Xankişiyev bu ittihamları rədd etdi. O qəzetimizə dedi ki, “bu qədər ağılsız hərəkət edə bilməz”. Amma zərərçəkən – “Azərenerji”nin sabiq prezidenti Müslüm İmanovun birinci müavini Rafiq Səfiyev qəzetimizə deyib ki, ona 40 min ABŞ dolları ziyan vuran A. Əliyevadan şikayətini geri götürmək üçün Mirzə Xankişiyevin təsirlərinə məruz qalıb. O deyib ki, “Bir il ərzində Mirzə Xankişiyev bəlkə də yüzlərlə dəfə məni çağırıb, dilə tuturdu ki, Aygünün arxasında elə vəzifəli şəxslər dayanıb ki, keçmək olmur. Dedim, o vəzifəli şəxslər onu belə çox istəyirlərsə, mənim pulumu ödəsinlər. Daha sonra Mirzə Xankişiyev mənə yaxın qohumlarımla təsir etməyə başladı. Axırda hakim mənə dedi ki, “Mən kişi kimi sənə söz verirəm ki, bu pulu ödətdirəcəm… necə olur olsun”. Elə adamları üstümə saldılar ki, axırda məcbur oldum ərizə yazdım ki, guya 40 min ABŞ dollarını Aygün Əliyeva mənə ödəyib. Mən bunu hakimin otağında yazdım”. Mirzə Xankişiyev qəzetimizə bildirib ki, onunla bağlı deyilənlər yalandır. Amma etiraf edib ki, məhkəmə prosesi zamanı zərərçəkən şəxslərlə görüşüb. O zərərçəkən R. Hüseynova ilə 50 dəfə görüşdüyünü deyib, amma bu addım qanun pozuntusudur. “Azərbaycan Respublikasının Məhkəmə və Hakimlər Haqqında Qanununun 17-ci maddəsində göstərilir ki, məhkəmə tərkibi ilə proses iştirakçıları arasında qeyri prosessual münasibətlər yolverilməzdir. Bu tələbin pozulması hakimin prosesdən kənarlaşdırılması və cəzalandırılması ilə nəticələnə bilər. Hakimlərin Etik Davranış Kodeksinin 13-cü maddəsində həmçinin hakimin icraatında olan işin aid olduğu şəxslərlə qeyri-prosessual münasibətlər yaratması qadağan olunmaqla, onlardan bu cür ünsiyyətdən çəkinmələri tövsiyə olunur”- vəkil Namizəd Səfərov qəzetimizə şərh edib.
A. Əliyeva aldatdığı şəxslərə özünü MTN -nin işçisi və Heydər Əliyev Fondunun əməkdaşı kimi təqdim edib. Amma zərərçəkənlər qadının istifadə etdiyi qurumlara bu haqda məlumat versə də heç bir tədbir görülməyib.
Aygünün həbsi və yazı müəllifinə «başını kəsərəm» təhdidi
Aygün Əliyeva axtarışda olduğu müddətdə redaksiyamızla əlaqə saxlayaraq bizimlə qəbirin içindən danışdığını deyib. Əlavə edib ki, Abşeron rayon Məhkəməsində prokuror ona 10 il iş istədikdən sonra özü onu qaçırıb. Dələduzluqda ittiham olunan qadın məhkəmə prosesinə “Bu qurma oyun idi” deyə şərh verib. O, “Bizim Yol” a zəng edərkən təhlükəsizliyinə təminat verildiyi halda qəbirdən çıxıb polisə təslim olacağını deyib. Amma polis onu qəbiristanlıqda tapmadı, “Gənclikdə” 200 nömrəli məktəbin qarşısında qızı ilə görüşərkən saxladı. Həmin vaxt A. Əliyeva ilə bir yerdə Azər Əlizadə də maşında olub. O, həmin Azər Əlizadədir ki, redaksiyamıza zəng edərək A. Əliyevanı evində saxlamaqda ittiham olunan oğlu- dünya və Avropa çempionu Salman Əlizadənin müdafiəsinə qalxıb yazı müəllifinin (bu sətirləri yazan müəllifi) başını kəsəcəyi ilə hədələyib.
Əməkdaşımızın həyatına sui-qəsd və polis şübhəli şəxsi niyə azadlığa buraxdı?
Həmin gün müxbir Qubada ezamiyyətdə olduğuna görə A. Əlizadəyə cavab verə bilməyib. Amma həmin gün şəhərdə “Bizim Yol” un yayım şöbəsinin əməkdaşı Vüsal Yusufov olub. O, 7 noyabra keçən gecə saat 03.20 radələrində qəzetin çap olunduğu “Futbol+” mətbəəsindən çıxarkən hücuma məruz qalıb. Əməkdaşımızın dediyinə görə ona 4 nəfər idmançı görkəmli və bu geyimdə olan şəxslər hücum edərək həyatına qəsd etmək istəyiblər. Qeyd edək ki, V. Yusufov heç kimlə probleminin olmadığını və bu hadisənin A. Əliyevanın qızının nişanlısı Salman Əlizadə haqqında yazıya görə törədildiyini deyib. Çünki yayım şöbəsinin əməkdaşı A. Əliyevadan zərər çəkən şəxslə görüşüb ona yazının çap olunduğu qəzet verirdi. Redaksiya ehtimal edir ki, zərərçəkən və ya qəzetin işçisi izlənilib. Onu da əlavə edək ki, V. Yusufovla görüşən zərərçəkən baş çəkdiyi obyektlərdən sonra A. Əliyeva birbaşa ona zəng edərək hədə qorxu gəlib. Bu da zərərçəkənin izlənmə ehtimalını gücləndirir. Hadisə baş verən gecə V. Yusufovun yaşadığı bulokun işıqlarının tamamilə söndürülməsi də əməkdaşımıza qarşı sui-qəsdin planlaşdırıldığını göstərir. Bütün bunlardan sonra Yasamal rayonu 28-ci Polis Bölməsində Cinayət Məcəlləsinin 221-ci maddəsi (xuliqanlıq) ilə cinayət işi açılıb. Bölmənin baş təhqiqatçısı, polis mayoru Mehbalı Rzayev V. Yusifovun Salman Əlizadənin şəklini görərək onu döyən şəxslərdən birinə çox bənzədiyini dedikdən sonra idmançıya zəng edib. S. Əlizadə deyib ki, hadisə baş verdiyi gün Lənkəranda təlim məşq toplantısında olub. Amma hadisə baş verən gün A. Əliyevadan zərər çəkənlərdən bir nəfər idmançını Bakıda görüb. Biz hadisə baş verən gün bunun A. Əliyevanın kürəkəninin evində gizləndiyi ilə bağlı yazılan yazı ilə əlaqəli olduğunu bildirdik. Amma yazıya görə hiddətlənən və bu sətirləri yazan müəllifi öldürəcəyi ilə hədələyən Azər Əlizadə nədənsə bu şübhəmizə görə redaksiyaya zəng etmədi. Bu susqunluq şübhələrimiz daha da artırdı. Oğlunu cinayətkarı istintaqdan gizlətməkdə ittiham etdikdə müəllifi öldürəcəyi ilə hədələyən ata, oğlunu birbaşa cinayət törətməkdə ittiham etdikdə susqun qalmamalı idi. 10 noyabra A. Əliyeva saxlanılarkən Azər Əlizadənin də maşında olması qəzetimizin idmançının ailəsinin axtarışda olan qadını gizlətdiyi ilə bağlı yazdığı ehtimalları gücləndirdi. DİN əməkdaşı qəzetimizə deyib ki, Azər Əlizadə və onun idmançı oğlu Salman Əlizadə məhkəmə baxışı zaman cinayətkarı istintaqdan gizlətməkdə ittiham oluna bilərlər.
Əməkdaşımız ağır dərəcədə yaralanan gün nəzarət kameraları işləyib. Amma təhqiqatçı kameraların uzaqdan çəkdiyinə görə şəxslərin bilinmədiyini deyib. Hadisə baş verən yerə tuşlanan nəzarət kamerası da həmin gün işləməyib. Bu da şübhələri artırır.
Vüsal Yusubov hadisədən bir gün sonra özü araşdırma aparaq ona hücum çəkən şəxslərdən birini müəyyənləşdirərək Yasamal rayonu 28-ci Polis Bölməsinə məlumat verib. Onun ifadəsi əsasında Anar İsgəndərov saxlanılıb, amma bir gün sonra azadlığa buraxılıb. Əməkdaşımız təhqiqatçıya onu döyən şəxlərdən birinin məhz A.İsgəndərov olması, habelə bir şahidin də həmin şəxsi hadisə yerində gördüyünü deməsinə baxmayaraq İsgəndərov sərbəst buraxılıb. Polisdən bunun səbəbi kimi «A.İsgəndərovun özünü təqsirkar bilmədiyi» göstərilib. Vüsal Yusubovun onu döyən şəxsi tanıması polis üçün niyə tutarsız dəlil hesab olunub, bu suala mütləq cavab verilməlidir.
Hazırda istintaq davam edir, ümid etmək olar ki, DİN rəhbərliyinin müdaxiləsindən sonra obyektiv araşdırma aparılacaq, qəzetimizin araşdırdığı dələduzluq olayının əməkdaşımıza qarşı sui-qəsdlə əlaqəsi barədə şübhələrə aydınlıq gətiriləcək. Habelə, Vüsal Yusubovun həyatına sui-qəsəd edənlər cinayət məsuliyyətinə cəlb olunacaqlar.
Sevinc VAQİFQIZI/BİZİM YOL QƏZETİ
