Müzəffər Baxışov: «Yeganə yol deputatların ərizə yazaraq öz səlahiyyətindən imtina etməsidir»
Bəlli olduğu kimi, Istiqlalçı Deputatlar Məclisi noyabrın 9-da növbəti iclasını keçirərək saxta parlamentin buraxılması tələbi barədəki bəyanat layihəsini müzakirə edib. Toplantıda qəbul edilən bəyanatda onlar parlamentin buraxılmasının zəruriliyini qeyd ediblər.
Xatırladaq ki, Ictimai Palata da bir müddət öncə həmin tələbi qoymuşdu. Məlumdur ki, 2010-cu il seçkiləri saxtalaşdırılandan sonra bu məsələ daha da aktuallaşıb. Maraqlıdır ki, cəmiyyətdə parlamentin buraxılması prosedurunun olmadığı da bildirilir. Amma siyasi qərar olsa ki, parlament buraxılmalıdır, onda bu məsələnin hüquqi yolu da tapılmalıdır.
Hüquqşünas Müzəffər Baxışov söyləyir ki, Konstitusiyada parlamentin buraxılması proseduru kimi qayda nəzərdə tutulmayıb. Bu məsələdə yeganə yol deputatların ərizə yazaraq Konstitusiyanın 89-cu maddəsinin 1-ci bəndinə əsasən, öz səlahiyyətindən imtina etməsidir: “Deputatın öz səlahiyyətindən imtina etməsi nəticəsində onun fəaliyyətinə xitam verilməsi barədə Konstitusiyada yalnız belə bir qayda var. Lakin Azərbaycanda parlamentin buraxılacağı təqdirdə bir sıra problemlər ortaya çıxa bilər. Çünki Milli Məclisə seçkilərin vaxtı qanunla dəqiq və dürüst tətbiq edilib. Bu nöqteyi-nəzərlə Konstitusiyaya dəyişikliklər edilməsiylə bağlı referendum da keçirilməlidir. Yeni parlamentin seçilmə müddəti, səlahiyyətlərlə bağlı da dəyişikliklər olmalıdır. Yəni belə problemlər yarana bilər. Konkret olaraq, indiki halda parlamentin buraxılması proseduru bizim Konstitusiyada təsbit edilməyib”. Müzəffər bəy əlavə edir ki, parlamentin səlahiyyətləri Konstitusiyamıza əsasən müəyyən olunur və Avropa Insan Hüquqları Məhkəməsinin qərarları Konstitusiyanın müvafiq maddəsinə görə ondan daha aşağı hüquqi qüvvəyə malikdir. Ona görə də Konstitusiyanın Azərbaycanın tərəfdar çıxdığı bütün beynəlxalq müqavilələrdən daha üstün hüquqi qüvvəsi var. Bu mənada Avropa məhkəməsinin seçki saxtakarlığı barədəki hər hansı qərarı bizim parlamentin buraxılmasına əsas verə bilməz: “Lakin normal, hüquqi, demokratik, dünyəvi dövlətdə Gülər Əhmədova olayıyla bağlı parlamentin deputatları mümkün qərar qəbul edərdi. Onlar parlamentin formalaşmasında kifayət qədər əsaslı şübhələr mövcuddursa, həmin parlamentdə fəaliyyət göstərməyərək səlahiyyətindən imtina edər. Amma mən bizim parlamentin deputatlarının öz səlahiyyətindən imtina etməsi barədə qərar qəbul etməsinə inanmıram”.
Nigar
