Samuxda fermerlərdən rüşvəti kimin adından yığırlar?
Samux rayonunda Mərkəzi Seçki Komissiyasın sədri Məzahir Pənahovun adından istifadə edən qudası “Pambıq Məntəqəsi”nin sədri kimi tanınan Ramiz Qocayev Toxumçuluq istehsalı ilə məşğul olan MMC-nin 147 ha ərazilərini ələ keçirməklə fermerlərə əməlli-başlı qənim kəsilib.
Kənd Təsərrüfatı Nazirliyinin Samux rayonunda “R.Əliyev adına Tərəvəz-bostan və kartof Toxumçuluğu üzrə Dövlət Kənd Təsərrüfatı Istehsalat Müəsissəsi MMC”nin direktoru Umudəli Tağıyev fermerlərə hər hektara görə “Taksa” müəyyənləşdirib.
Bu haqda “Azadlıq”a Samux rayon Füzuli kənd sakini Babayeva Olqa Sevindik qızının özü açıqlama verib. Xanım fermerin dediyinə görə, 01.06.2008-ci il tarixdən toxumçuluq istehsalı ilə məşğul olmaqla MMC-dən müqavilə əsasında 13 ha torpaq sahəsi götürərək bu günə kimi əkib-becərməklə yerli toxum istehsal etməklə məşğul olub. “Hər il fizki şəxs kimi adımdan dövlət büdcəsindən hər hektara görə ayrılan külli miqdar subsidiyanı MMC rəhbərliyi ilə Samux rayon Toxumçuluq üzrə müfəttişi Ələkbərov Nəriman cənabları mənimsəyib”.
Hazırda MMC rəhbərliyinə haqq vermədiyini bildirən Olqa Babayevanın 2 ha toxum üçün nəzərdə tutulan kəvər sahəsini, eləcə də 11 ha yaz əkini üçün dincə qoyulmuş əkin ərazisinə Samux rayon pambıq məntəqəsinin müdiri Ramiz Qocayevin göstərişi sayəsində taxıl əkdirilmişdir. Olqa xanım yerinin qeyri-qanuni əkilməsi ilə bağlı pambıq məntəqəsinin sədri Ramiz Qocayevə öz etirazını bildirərək ondan Prezidentə teleqram vuracağını bildirəndə cavabı belə olub: “Hara, kimə teleqrama vurursunuz, vurun. Bu əraziləri Prezidentin özü Mərkəzi Seçki Komissiyasının sədri Məzahir Pənahov cənablarına verib”. Himayəsində iki azyaşlı uşağı olan ailənin yeganə qazanc mənbəyi, eləcə də 15 nəfər kənd sakinlərini işlə təmin edən Olqa Babayeva Kənd təsərrüfat naziri Ismət Abbasovdan Füzuli kəndində fəaliyyət göstərən “R.Əliyev adına Tərəvəz-bostan və kartof Toxumçuluğu üzrə Dövlət kənd Təsərrüfat Istehsalat Müəsisəsi MMC”
direktorunun özbaşınalıqlarına son qoyulmasını, eləcə də ona məxsus olan torpaq sahələrinin geri qaytarılmasını tələb edir.
