2016-cı ildə Hillari Klintonla Ceb Buşun rəqib olacağı gözlənilir
ABŞ-da 2016-cı ildə keçiriləcək prezident seçkilərində iki «ağır çəkili» namizəd üz-üzə gələ bilər. Söhbət hazırkı dövlət katibi Hillari Klinton və Florida ştatının eks-qubernatoru Ceb Buşdan gedir. Ceb Buş böyük Corc Buşun oğlu və kiçik Corc Buşun qardaşıdır. Belə bir ehtimalı Amerikanın «Politico» qəzeti irəli sürüb.
Qəzet belə bir nəticəyə gəlməsini adları çəkilən şəxslərin hazırda partiyalarında daha çox nüfuz sahibi olmasıyla izah edib. Belə ki, Hillari Klinton 2008-ci il prezident seçkiləri ərəfəsində Demokratlar Partiyasında keçirilən ilkin seçkidə Obamaya cüzi fərqlə uduzmaqla nəyə qadir olduğunu nümayiş etdirmişdi. Ceb Buşun namizədliyini irəli sürmə şansları Klintondakı kimi aydın görünməsə də, eks-qubernatorun bir çox xüsusiyyətləri onu uğurlu namizədə çevirə bilər. Bundan başqa Klintonun Obmanın andiçmə mərasimindən sonra dövlət katibi postundan istefa verəcəyi ilə bağlı xəbərlər, onun məhz 2016-cı ildə keçiriləcək seçkilərə hazırlaşdığı fikrini bir qədər də möhkəmlədir.
azadliq.info
