«Yeni Azərbaycan» «AzərRos» prezidentinin ünvanına absurd ittihamlar səsləndirdi
Rusiyada yaradılan və “Milyarderlər ittifaqı” kimi Rusiya Azərbaycan Təşkilatları Ittifaqının koordinasiya Şurasının üzvü, “AzərRos”un prezidenti Söyün Sadıqov hakimiyyətin hədəfinə çevrilib. Artıq rəsmi mətbuat S.Sadıqova qarşı kampaniyaya start verib. Hakim partiyanın mətbu orqanı “Yeni Azərbaycan” qəzeti “AzərRos” prezidentinin ünvanına bir sıra ittihamlar səsləndirib.
Qəzet S.Sadıqovu doğulduğu ölkədə, yəni Gürcüstanda azərbaycanlılara qarşı edilən təzyiqlərə göz yummaqda, ölkəmizdə baş verən siyasi proseslərə qeyri-adekvat münasibət bildirməkdə günahlandırır. Absurd səslənsə də, “AzərRos” prezidenti həmçinin Gürcüstan ərazisindən Ermənistana yeni çəkiləcəyi söylənilən dəmir yolu xəttinin inşasına mane olmamaqda da ittiham edilir.
Qəzetin ehtimallarına görə, S.Sadıqovu Azərbaycanın milli maraqları deyil, cibində pasportunu daşıdığı ölkədə mövcud olan bəzi antiAzərbaycançı mərkəzlərin maraqları və bu ölkədən əldə etdiyi və edəcəyi imtiyazlar daha çox düşündürür.
Qəzetin bu ittihamlarına cavab almaq üçün Söyün Sadıqovla əlaqə saxladıq. “AzərRos” prezidentinin köməkçisi ünvanlarına deyilən cılız ittihamlarla tanış olduqlarını, lakin bunlara ayrı-ayrılıqda cavab vermək istəmədikləri bildirdi. S.Sadıqovun təmsilçisi bu kimi ittihamların davamının olduğunu gözlədiklərini də qeyd etdi: “Hər gün bir ittiham səsləndirirlər. Onlara ayrı-ayrılıqda cavab verməkdə özünə bəraət qazandırmaq kimi anlaşılır. Bilirik ki, bunun ardı da olacaq. Ürəklərini boşaltsınlar, bütün ittihamların cavabını axırda verərik”.
Fizzə