Vüsalə Mahirqızı APA TV açır, Qabil Abbasoğlu TV-yə, Səbuhi Məmmədli isə Lent.az-a rəhbər gəlir
“APA Holdinq” yeni böyük layihələrə başlayır. Bu barədə xəbəri Gunxeber.com saytı yayımlayıb. Saytın yazdığına görə, bu istiqamətdə çox ciddi addımlar atılıb. Belə ki, yeni layihənin əsasını APA TV-nin yaradılması təşkil edir. Artıq ilkin dövrlərdə internet televiziya kimi fəaliyyət göstərəcək bu media quruluşunun rəhbərliyi və işçilərinin xeylisi müəyyənləşib.
APA TV-yə rəhbərlik Lent.az-ın indiki rəhbəri Qabil Abbasoğluna tapşırılacaq. Heyətə ən çevik reportyorların yüksək məbləğə cəlb olunması planlaşdırılır. Lent.az-ın rəhbərliyinin isə hazırda saytın reportyoru Səbuhi Məmmədliyə tapşırılması nəzərdə tutulur.
Sayt yazır ki, APA-nın rəhbəri Vüsalə Mahirqızı hər iki şəxsə öz komandalarını yaratmağı tapşırıb. Onlar isə bu istiqamətdə ciddi işlər görərək, ciddi imzaları yeni layihəyə cəlb etməyi planlaşdırırlar.
Kulis.az-ın da rəhbərliyi dəyişəcək. Artıq Vüsalə Mahirqızı saytın rəhbəri Qan Turalı ilə yollarını ayırmaq ərəfəsindədi. Ortaya başqa məsələ çıxmasa, Qan Turalının Kulis.az-dan uzaqlaşdırılması qərarı dəyişməyəcək. Məlumata görə, V.Mahirqızı onunla konflikti olan Publika.az-ın baş redaktoru Aynur Camalqızının saytında işləyən Cəlil Cavanşiri Kulis.az-a gətirməyi planlaşdırır.
Bundan başqa, Vüsalə Mahirqızı müxalif və müstəqil mediada çalışan jurnalistləri də holdinqində çalışdırmaq üçün sayt rəhbərlərinə göstəriş verib. Artıq bir neçə jurnalistlə danışıqlar aparılıb və nəticələr əldə olunub. Sirr deyil ki, APA-nı maliyyələşdirən şəxs Fövqalədə hallar naziri Kəmaləddin Heydərovdur.
Bir sözlə, “APA”nın yeni layihəsinin gələn il keçiriləcək prezident seçkisinə hesablandığı bildirilir.
Onu da qeyd edək ki, V.Mahirqızı nə qədər uğurlu media meneceri olsa da, bu layihələri öz imkanları hesabına yox, hakimiyyətdəki qüdrətli əl hesabına reallaşdırır. Etiraf olunmalıdır ki, hakimiyyətdən indiyədək xeyli adama pul ayrılıb. Bu və başqa formada həmin layihələrin çoxu iflasa uğrayıb.
Ramin DEKO
