Mərkəzin Koordinasiya Şurasının toplantısında Köçəri Nağıbəyli sədr seçilib
Noyabrın 8-də Qərbi Azərbaycan Deportasiya Qurbanları Mərkəzinin Koordinasiya Şurasının toplantısı keçirilib. Mərkəzdən “Azadliq.info” saytına verilən məlumata görə, gündəlikdə bir sıra mühüm məsələlər olub. Mərkəzin sədri politoloq Eldar Namazov gündəliyi təqdim edib. Ölkədə yaranmış ictimai-siyasi durum, qurumun fəaliyyətinin gücləndirilməsi, ölkədə fəaliyyət göstərən aparıcı ictimai-siyasi qurumlarla əməkdaşlığın genişləndirilməsi, növbəti mərhələ üçün yeni sədrin seçilməsi gündəliyə daxil edilib.
Gündəlikdəki məsələlər ətrafında Eldar Namazov, professor Firudin Cəlilov, professor Eldar Abbasov, sabiq baş prokuror Əli Ömərov, tanınmış ictimai xadimlər Nurəddin Mustafayev, Köçəri Nağıbəyli, xalq şairi Vahid Əziz, araşdırmaçı alim Əziz Ələkbərli və digər natiqlər çıxış ediblər. Növbəti mərhələ üçün Qərbi Azərbaycan Deportasiya Qurbanları Mərkəzinə Köçəri Nağıbəyli yekdilliklə sədr seçilib.
Mərkəz noyabrın 2-də Milli Məclis tərəfindən “Sərbəst toplaşmaq azadlığı haqqında” Qanuna razılaşdırılmayan aksiyalara görə cərimələrin və cəzaların artırılmasını nəzərdə tutan dəyişiklik edilməsini qətiyyətlə pisləyib və bu dəyişikliyi antidemokratik dəyişiklik və heç bir sosial, siyasi ölçüyə sığmayan qərar adlandırıb. Deportasiya Qurbanları Mərkəzi Gülər Əhmədova ilə bağlı yayılan məlum videodan sonra hüquq-mühafizə orqanları tərəfindən aparılan araşdırmanı qeyri-qənaətbəxş sayıb. Hələ də həmin videodan açılan cinayət faktlarına hüquqi qiymətin verilməməsini təəssüflə qeyd edib. Deportasiya Qurbanları Mərkəzi ölkədə mövcud olan aparıcı ictimai, siyasi qurumlarla əməkdaşlığın gücləndirilməsi haqqında qərar verib.
Qeyd edək ki, Köçəri Nağıbəyliyə qədər Qərbi Azərbaycan Deportasiya Qurbanları Mərkəzinə rotasiya qaydasında Firudin Cəlilov, Nurəddin Mustafayev, Eldar Namazov rəhbərlik edib.
