“Mənim siyahımda olan video görüntülər yalnız qardaşımı ogurlayan mütəşəkkil cinayətkar təşkilatın üzvləri ilə bağıdır”
Fəaliyyəti dayandırılmış ABU-nun rektoru, hazırda Fransada mühacirətdə olan Elşad Abdullayevin “Wikileaks” kimi bir sayt açacağı deyilir. Bu barədə xəbəri ANS telekanalı yayılıb. Kanalın iddiasına görə, E.Abdullayev əlində olan maraqlı və sensasiyalı materillardan daha faydalı şəkildə istifadə etmək məqsədilə bu yaxınlarda belə bir sayt açacaq. Kanal onu da iddia edib ki, sabiq rektor onda olan ifşa xarakterli materiallar içərisində müxalifət nümayəndələri haqqında da xeyli maraqlı faktların olduğunu bildirib.
E.Abdullayev isə “Modern.az”a açıqlamasında bu məlumatların həqiqətə uyğun olmadığını bildirib. “Müxalifət partiyalarının sədrləri və partiyaların rəhbərliyində təmsil olunanlarla bağlı məndə heç bir audio-video görüntülər yoxdur. Mənim siyahımda olan video görüntülər yalnız qardaşım, Milli Təhlükəsizlik Nazirliyinin zabiti Mahir Abdullayevi ogurlayan mütəşəkkil cinayətkar təşkilatın üzvləri ilə bağıdır”, – deyə E.Abdullayev vurğulayıb.
