Sabiq rektor DIN-in yüksək rütbəli əməkdaşı ilə görüşündə konkret ad çəkib
Əyyub Kərim: «Elşad Abdullayev Elxan Həsənovla görüşündə qardaşının oğurlandığını deyib və bu işdə konkret bir şəxsi ittiham edib»
Fəaliyyəti dayandırılmış Azərbaycan Beynəlxalq Universitetinin rektoru, hazırda Fransada mühacirətdə olan Elşad Abdullayevin qardaşı Mahir Abdullayevin itkin düşməsi faktı ilə bağlı vaxtilə araşdırma aparan və bu işlə əlaqədar kifayət qədər məlumatlı olan tanınmış hüquqşünas, “Femida-007″ qəzetinin baş redaktoru Əyyub Kərimin vəd etdiyimiz müsahibəsini təqdim edirik:
Prokurorluq dələduzluq faktı ilə Mahir Abdullayevin işinə çıxacaq?
– Əyyub bəy, Mahir Abdullayevin işilə bağlı Elşad Abdullayevin adını hallandırdığı Arzu Kazımov həbs edilib. Bu həbs “Mahir Abdullayev müəmması”nın açılmasında nə kimi rol oynaya bilər?
– Əvvəlcə onu deyim ki, mətbuatda Arzu Kazımovun vəkili Ramiz Zeynalovun bu həbslə bağlı fikirlərini oxudum. O, hesab edir ki, Arzu Kazımovun həbsi qanunsuzdur. Mən bu fikri bölüşürəm…
– Sizcə, Arzu Kazımov həbs edilməməli idi? Edilməməli idisə niyə?
– Mən hesab edirəm ki, Baş Prokurorluq odu söndürüb külü ilə oynayır. Diqqət edin, prokurorluq verdiyi açıqlamada bildirir ki, Arzu Kazımovun həbsi Mahir Abdullayevin işilə əlaqədar deyil. Elşad Abdullayev isə ölkə prezidentindən, həmçinin hüquq-mühafizə orqanlarından qardaşının itkin düşməsi faktının araşdırılmasını, nə baş verdiyinin üzə çıxarılmasını tələb edir. Təsadüfi deyil ki, Elşad Abdullayevin bacısı oğlu, 25 il MTN-də çalışan şəxs də deyir ki, istintaq orqanı əsas məsələni kənara qoyub. Bildirir ki, biz həbs edilən şəxslərdən şikayətçi deyilik. Mən onun fikirlərilə tam razıyam. Müstəqil Istintaq Komissiyası dələduzluq faktına görə yaradılmayıb axı. Bu komissiya Mahir Abdullayevlə bağlı nə baş verdiyini araşdırmaq üçün yaradılıb.
– Elşad Abdullayevin bacısı oğlu o fikirləri həbs olunan digər iki nəfəri – Vaqif Hüseynov və Salman Ağayevi nəzərdə tutaraq deyib…
– Nəzərdən qaçırmayaq ki, həmin müsahibə dərc ediləndə Arzu Kazımovun həbsi barədə hər hansı məlumat yox idi. “Azadlıq” qəzeti bu məlumatı Elşad Abdullayevin bacısı oğlunun açıqlamasından sonra yayıb. Digər tərəfdən mən inanıram ki, Elşad Abdullayevə dələduzluq faktından çox, qardaşının başına nə gətirildiyi maraqlıdır. Baxmayaraq ki, Elşad Abdullayev məni həmişə əsassız yerə ittiham edir, amma mən bir hüquqşünas kimi bu məsələnin açılmasının tərəfdarıyam.
Mənim üçün anlaşılan deyil, prokurorluq dələduzluq faktı ilə Mahir Abdullayevin işinə çıxacaq? Təki belə olsun. Amma Baş Prokurorluğun yaydığı məlumat da göstərir ki, belə deyil. Mən hesab edirəm ki, istintaq ilk növbədə Mahir Abdullayevin itkin düşməsi faktını araşdırmalı, nə baş verdiyini üzə çıxarmalı, Elşad Abdullayevin suallarına cavab verməlidir. Bundan sonra o iş ətrafında baş verən digər cinayət əməlləri araşdırılmalıdır.
Bu iş üzrə adı hallanan hər kəs dindirilməlidir
– Elşad Abdullayev ölkə başçısına və KIV-ə müraciətlərində təkcə Arzu Kazımovun adını çəkməyib. O, qardaşının işilə bağlı milli təhlükəsizlik nazirinin müavini Hilal Əsədovun, həmin qurumun yüksək rütbəli zabiti Akif Çovdarovun, DIN-in rəhbərliyinə daxil olan şəxslərin adını hallandırıb. Necə hesab edirsiniz, istintaq həmin şəxsləri də dindirəcəkmi?
– Mən deyə bilmərəm istintaq adını çəkdiyiniz şəxsləri dindirəcək ya yox. Amma əlbəttə ki, dindirməlidir. Ümumiyyətlə, bu işdə kimlərin adı çəkilirsə, hamısı istintaqa cəlb edilməli, dindirilməlidir. Bu işi əvvəl aparan müstəntiqlər də dindirilməlidir. Mən sizə ötən müsahibəmdə demişdim ki, Mahir Abdullayevin itkin düşməsi faktı ilə əvvəlcə DIN-də 144-cü (adam oğurluğu) maddə ilə cinayət işi başlanıb. Lakin sonradan iş 120-ci (qəsdən adam öldürmə) maddəsinə tövsif edilib. Bax bu işi həmin maddəyə tövsif edən müstəntiq dindirilməlidir. Ondan soruşulmalıdır ki, hansı əsasla adam oğurluğu maddəsini qəsdən adam öldürməyə tövsif etmisən? Mahir Abdullayevin qəsdən öldürülməsilə bağlı əlində nə kimi dəlil-sübutlar olub? Bütün bunlara aydınlıq gətirilməlidir.
Bəylər Əyyubovun adası, Şəfiqə Əliyevanın dənizdəki evi…
– Elşad Abdullayevin “Azadlıq”a yolladığı materialların birində Mahir Abdullayevin deputat Iqbal Ağazədənin bağ evində saxlanılması barədə ehtimal yer almışdı. Bu barədə sizdə hər hansı məlumat varmı?
– Bu məsələyə Iqbal Ağazadə özü aydınlıq gətirib. Məndə “bağ söhbəti”lə əlaqədar başqa məlumatlar var. Bildiyimə görə Elşad Abdullayev daxili işlər naziri Ramil Usubov və onun müavini mərhum Zahid Dünyamalıyevlə görüşəndən sonra DIN-in başqa bir yüksək rütbəli əməkdaşı ilə də təmasda olub.
– Həmin şəxsin adı sizə bəllidirmi?
– Bəli. Bu şəxs o zaman DIN-də adam oğurluğu şöbəsinin rəisi, hazırda isə Bakı Şəhər Baş Polis Idarəsinin rəis müavini işləyən general-mayor Elxan Həsənovdur. Elşad Abdullayev onunla görüşündə qardaşının kimlərinsə bağ evində girov saxlanılması barədə məlumat verib. Amma orada Iqbal Ağazadənin adını çəkməyib.
– Bəs kimlərin adını çəkib?
– O, prezidentin əmisi Cəlal Əliyev, şəxsi mühafizə xidmətinin rəhbəri Bəylər Əyyubov, bibisi Şəfiqə Əliyeva, fövqəladə hallar naziri Kəmaləddin Heydərov, Müdafiə Nazirliyinin Baş Qərargah rəisi Nəcməddin Sadıqovun adını çəkib. Deyib ki, onda olan məlumata görə qardaşı ya Cəlal Əliyevin bağ evində, ya Şəfiqə Əliyevanın dənizdə olan evində – Elşad Abdullayev belə deyib – ya Kəmaləddin Heydərovun mühafizəçisinin evində, ya Bəylər Əyyubovun adasında – Elşad Abdullayev belə deyib – ya da Nəcməddin Sadıqovun Razindəki evində saxlanılır. Elşad Abdullayev Elxan Həsənovdan israrla xahiş edib ki, adını çəkdiyi adamların bağ evlərində axtarış-əməliyyat tədbirləri keçirilsin.
DIN hansı addımları atıb?
– Elxan Həsənovun cavabı nə olub?
– Sözsüz ki, Elşad Abdullayevin Ramil Usubov və Zahid Dünyamalıyevlə görüşündən sonra Elxan Həsənovla görüşməsi təsadüfi ola bilməzdi. Yəni, DIN rəhbərliyinin bu görüşdən xəbəri olub və burada olan söhbət Ramil Usubova məruzə edilib. Başqa cür ola bilməz…
– Elşad Abdullayev Elxan Həsənovla DIN-də görüşüb?
– Xeyr. Məndə olan məlumata görə, bu görüş Arzu Kazımovun ofisində baş tutub. Arzu Kazımovun Elşad Abdullayevlə münasibətləri yaxşı olub. O, eyni zamanda Elxan Həsənovla dostluq edib. Bu görüşü o təşkil edə bilər. Amma görüş və bunun nəticəsi barədə DIN rəhbərliyi məlumatlı olub.
– DIN Elşad Abdullayevin adını çəkdiyi şəxslərin bağ evlərində əməliyyat-axtarış tədbirləri həyata keçiribmi?
– Məndə olan məlumata görə DIN bu istiqamətdə müəyyən addımlar atıb. Amma nəticə nə olub, onu bilmirəm.
– Ötən müsahibənizdə demişdiniz ki, DIN bu işi araşdırıb və qəfil dayanıb…
– Bəli. Amma mən deyə bilmərəm ki, məhz bu “bağ söhbəti”nin nəticəsi Ramil Usubovu qorxudub. Bəlkə heç Elşad Abdullayevin söylədikləri təsdiqini tapmayıb. Yəni, nəticə mənə dəqiq bəlli deyil.
Arzu Kazımovla bağlı da video var
– Əyyub bəy, Elşad Abdullayevin müraciətlərində bu görüş barədə heç bir qeyd yoxdur. Bu baxımdan sizdə olan məlumatın dəqiqliyi bir qədər şübhəli görünür.
– Əvvəla, mən dəqiq bilmədiyim şey haqqında danışmaram. Ikincisi, Elşad Abdullayev və onun nümayəndələri dəfələrlə deyib ki, çox şeylər var, amma hələ açıqlamırıq. Aydındır, onlar istintaq sirrini yaymamaq barədə iltizama imza atıblar. Bir də axı biz hardan bilirik ki, Elşad Abdullayev prokurorluğa göndərdiyi materiallarda Elxan Həsənovun adını çəkməyib?! Elşad Abdullayevin KIV-ə açıqladıqları hüquq-mühafizə orqanlarına təqdim etdiyi materialların cüzi bir hissəsidir. Baxın, Elşad Abdullayev bu gün iki video yayıb. Amma deyir ki, əlimdə 100-ə yaxın video var. Elşad Abdullayev prokurorluğa xeyli video material göndərib. Orada Arzu Kazımovla bağlı da videolar var. Həmin videolarda Arzu Kazımovun Mahir Abdullayevin qayınatası ilə və Elşad Abdullayevlə söhbətləri əks olunub. Hesab edirəm ki, Arzu Kazımov məhz bu videolardan sonra istintaqa cəlb olunub. Digər tərəfdən məndə məlumat var ki, Elşad Abdullayev Elxan Həsənovla görüşündə qardaşının oğurlandığını deyib və bu işdə konkret bir şəxsi ittiham edib.
– Həmin şəxs kimdir?
ardı var
Vidadi Məmmədov
