Dünyanın ən yaxşı futbolçusu Lionel Messi son 100 ilin rekordunu qıra bilər. Apasport.az saytının məlumatına görə, “Barselona”nın 25 yaşlı hücumçusunun Çempionlar Liqasının qrup mərhələsinin IV turunda “Seltik”ə Şotlandiyada vurduğu qol cari ildə beynəlxalq arenada 23-cü olub.
Bu, 103 il öncə – 1909-cu ildə “Çelsi” və “Tottenhem”də oynamış Vivyen Con Vudvordun göstəricisindən 2 qol azdır. O vaxt futbolçu beynəlxalq matçlarda 25 qol vurmuşdu.
Şotlandiyada vurduğu qolu yeni doğulan oğluna həsr edən Lionel iranlı Əli Daei, braziliyalı Ronaldo və omanlı Hami Əl-Noubini qabaqlayaraq, rekordçu olub. Belə ki, hər 3 futbolçu 1 ildə 22 qol vurmuşdu.
İndi Messi ötən əsrin rekordunu qırmaq üçün cari ildə qalan 4 oyunda 3 qol vurmalıdır. Həmin qarşılaşmalar ÇL-də “Spartak” və “Benfika”, eləcə də, Argentina yığmasının Səudiyyə Ərəbistanı və Braziliya ilə oyunlardır.
