Güney Azərbaycan Milli Oyanış Hərəkatının (GAMOH) sədri Mahmudəli Çöhrəqanlı bəlli olduğu kimi, Ankara hava limanından geri qaytarılıb. Türkiyənin Millətçi Hərəkat Partiyasının qurultayında iştirak etmək üçün bu ölkəyə gedən GAMOH lideri hələ Vaşinqtonda olarkən açıqlama verərək Türkiyəyə 6 ildən sonra döndüyünü bildirib.
Türkiyədən deportasiya olunmayacağına inanan Çöhrəqanlı bu səfərdən sonra Bakıya gələcəyini də bildirib. Bunun üçün Vaşinqtonda səylərini davam etdirəcəyini qeyd edən M.Çöhrəqanlı nə olur-olsun, ən qısa zamanda Bakıya gələcəyini vəd edib.
Mövcud reallıq isə ortadadır və Türkiyəyə buraxılmayan Çöhrəqanlının Bakıda da eyni münasibətlə üzləşməyəcəyi siyasilərin diqqətindədir.
Politoloq Vəfa Quluzadənin qənaətincə, məsələnin mahiyyəti Türkiyə-Iran və Azərbaycan-Iran əlaqələrindən ibarətdir. Politoloqa görə, hər iki ölkə Iranın əleyhinə əks-təbliğat, siyasət aparmır. Ona görə də Irandan mühacirət etmiş bir dissident Azərbaycan və Türkiyədə qarşılansa, bu, Iranın narazılığına səbəb olacaq: “Məsələyə qiymət verməkdə çətin bir şey yoxdur. Əminəm ki, Azərbaycan da Türkiyə kimi addım atacaq və Çöhrəqanlını qəbul etməyəcək”.
Siyasi ekspert Nurəddin Məmmədli hesab edir ki, Türkiyənin baş naziri Rəcəb Tayyib Ərdoğan bütün müsəlman dünyasında demokratiyanın simvoluna çevrilmək istəyir. Həmsöhbətimizə görə, lakin bəzi addımlar var ki, onu demokratiya ilə izah etmək mümkün deyil: “Türkiyənin narahatçılığı başadüşüləndir, çünki onun Iranla iqtisadi əlaqələri, böyük neft-qaz müqavilələri var. Türkiyə iqtisadiyyatının inkişafında Iran faktoru müstəsna rol oynayıb. O cümlədən, siyasi məsələlərdə də bu əməkdaşlıq böyük səviyyədə olub. Ona görə də hesab edirəm, bu ölkələrin qarşılıqlı münasibətinə görə Çöhrəqanlının Türkiyəyə buraxılmaması birbaşa Iranla münasibətlərin korlanmaması üçün atılan addımdır”.
Nigar
