Qəzet rəhbərliyi 4 min sadiq oxucusuna müraciət edəcək
Oxuculardan Anar Məmmədovun hesabına 1 manat köçürmək xahiş olunacaq
Dünən “Azadlıq” qəzetinin bank hesabına həbs qoyuldu. Yasamal Rayon Icra Şöbəsi nəqliyyat naziri Ziya Məmmədovun oğlu Anar Məmmədovun iddiası ilə çıxarılmış məhkəmə qərarının icrasına başlayıb. Xatırladaq ki, bu il yanvarın 23-də məhkəmə A.Məmmədovun iddiası ilə qəzetə 4 min 200 manat cərimə kəsib. Məhkəmə qəzetin boynuna təkzib və üzrxahlıq öhdəliyi də qoyub. Qərara əsasən, “Azadlıq” qəzetindən tutulan pul Buzovna qəsəbəsindəki Ruhi-Əsəb-Əlil Qocalar Evinin hesabına köçürülməlidir.
“Azadlıq”ın baş redaktorunun birinci müavini Rahim Hacıyev A.Məmmədovun qəzetin hesabına xeyriyyəçilik etmək istədiyini deyir: “Biz bu vaxta qədər Anar Məmmədovun xeyriyyəçilik fəaliyyəti barədə heç nə eşitməmişik. Görünür, indi bizim hesabımıza xeyriyyəçilik etmək fikrinə düşüb. Məhkəmə qərarının icraya yönəldilməsi hakimiyyətin ”Azadlıq”ı çökdürmək üçün atdığı növbəti addımdır. Biz də qərara gəlmişik ki, “ZQAN Holdinq”in nəzarətində olan “Bank of Azərbaycan”da Anar Məmmədovun adına hesab açaq. 4 min sadiq oxucumuza da müraciət edək ki, hər biri həmin hesaba 1 manat köçürsün. Inanırıq ki, oxucularımız bizi anlayışla qarşılayacaq və kampaniyamız uğurla başa çatacaq. Qoy, Anar Məmmədov da toplanacaq vəsaitlə xeyriyyəçilik etsin. “Azadlıq”ın indiki şəraitdə bu yola əl atmaqdan başqa çarəsi qalmır”.
Media Hüququ Institutu “Azadlıq” qəzetinə məxsus bank hesablarının üzərinə həbs qoyulmasını bu önəmli media quruluşuna qarşı qanuni bəraəti olmayan təzyiq kimi dəyərləndirir. Həmçinin hökumətin tənqidçi medianın sıxışdırılmasına xidmət edən qanunsuz qərara səssiz qalmasından təəssüflənir: “Son 1 ildə məmurlar, millət vəkilləri, hökumətə bağlı biznes adamları ”Azadlıq” qəzetinə qarşı ona yaxın iddia qaldırıblar. Yerli məhkəmələr baxdıqları iddiaların əksəriyyətini təmin ediblər. Bakı Metropoliteni Idarəsinin rəisi Tağı Əhmədovun, millət vəkili Novruzəli Aslanovun, “Binə” Ticarət Mərkəzinin rəhbəri Kəbirə Məmmədovanın, iş adamı Anar Məmmədovun iddialarına baxan məhkəmə qəzetin və onun əməkdaşlarının üzərinə ümumilikdə 65ÿmin manatdan çox təzminat yükü qoyub. “Azadlıq” qəzeti həmin vəsaitin 4200 manatını nəqliyyat nazirinin oğlu, “ZQAN Holdinq” Şirkətlər Qrupunun rəhbəri Anar Məmmədova ödəməlidir. Yasamal Məhkəməsi Icra Şöbəsi qəzetin bank hesabına həbs qoyulmasını məhz Anar Məmmədovun “Azadlıq”a qarşı işi üzrə qərarın icraya yönəldilməsi ilə əsaslandırıb”.
MHI Yasamal Icra Şöbəsinin qəzetin bank hesabı üzərinə həbs qoymasının çox ciddi hüquq pozuntuları ilə müşayiət olunduğunu bildirir: “Qəzetin bank hesabı üzərinə həbs qoyulmasının qüvvəyə minmiş məhkəmə qərarının olması arqumenti ilə əsaslandırılması tamamilə qanunsuzdur. Çünki, yuxarıda qeyd olunan Anar Məmmədov ”Azadlıq”a qarşı işi üzrə qəzetin maddi təzminat ödəməsini nəzərdə tutan qərarının icraya yönəldilməsindən bir həftə öncə məhkəmə qaydasında şikayət edilib. “Məhkəmə qərarlarının icrası haqqında” qnununun 17-ci maddəsinə görə, icra ilə bağlı iddia qaydasında mübahisə qaldırılarsa, icraatın dayandırılması məcburidir. Həmin qanunun 19-cu maddəsinə görə, belə durumlarda icraat iddia üzrə mübahisə bitənədək dayandırılmalıdır. Məhkəmə icraçıları qanunun bu maddələrini pozublar. Məhkəmə icraçılarının hüquqi qüvvəsi olan qərara söykənmədən “Azadlıq”ın bank hesabı üzərinə həbs qoyması gündəlik nəşrin iş mühitini iflic edib. Bu eyni zamanda jurnalistin qanuni peşə fəaliyyətinə mane olmağa görə məsuliyyət yaradan əməldir”.
Media Hüququ Institutu pozuntularla müşayiət olunan qərarı ölkədə söz azadlığına ciddi müdaxilə sayır, ölkədə çoxsəsliliyi təmin edən qəzetin sıradan çıxarılmasına xidmət etdiyini vurğulayır. Qurum “Azadlıq” qəzetinə qarşı bu qanunsuz addımı qətiyyətlə pisləyir, hökuməti qanunsuzluğa yol vermiş və onları icra etmiş şəxslərin hərəkətlərini araşdırmağa, ölçülər götürməyə, media qurumunun pozulmuş haqlarını bərpa etməyə çağırır.
