Milyarderlərin nümayəndəsi Bakıda onlara qarşı çıxanlara sərt mesajlar göndərdi
Söyün Sadıqov: «Azərbaycan Prezident Administrasiyası birləşmək təşəbbüsümüzü dəstəklədi, təşkilat yarananda isə narazılıqlar və hiddət dalğası doğdu»
«İntriqantlar aparat oyunu qurub, isterikadan siyasi dividentlərini əldə etmək istəyirlər»
“Milyarderlər ittifaqı” kimi tanınan Rusiya Azərbaycan Təşkilatları Ittifaqının ətrafında müzakirələr səngimək bilmir. Azərbaycan hakimiyyətinin bu qurumu süngü ilə qarşılaması isə daha çox rəsmi Bakının təşkilatdan ehtiyatlandığı kimi qələmə verilir. Təşkilatı yaradanlardan biri, “AzərRos”un prezidenti Söyün Sadıqov fəaliyyətləri və özlərinə qarşı aparılan kampaniya ilə bağlı “Azadlıq” qəzetinin suallarını cavablandırıb.
– Rusiyada Rusiyadakı Azərbaycanlıların Federal milli-mədən muxtariyyatı, Ümumrusiya Azərbaycan Konqresi, Rusiyanın Azərbaycan Gənclər Təşkilatı fəaliyyət göstərir. Daha bir təşkilat- Rusiya Azərbaycan Təşkilatları Ittifaqı yaradılıb. Bu təşkilatı yaradarkən hansı məqsəd güdürdünüz?
Zeynal Nağdəliyev bizə dəstək verdi
– Azərbaycan təşkilatlarının Koordinasiya Şurasının (KŞ) yaradılması ideyası mənim tərəfimdən hələ 2001-ci ildə səsləndirilmişdi və biz onun reallaşdırılması imkanlarını regional birliklər, daha sonra isə Ümumrusiya Azərbaycan Konqresinin icraçı direktoru Zeynal Nağdəliyevlə və Azərbaycanın Rusiyadakı səfirliyinin nümayəndəsi Arif Babayevlə müzakirə etmişik. Beləliklə, biz bütün Azərbaycan təşkilatlarının, ilk növbədə ÜAK və AzərRos AFMK-ın fəaliyyətini koordinasiya etmək istəyirdik ki, diaspor möhkəm yumruq kimi olsun və məqsədyönlü şəkildə ictimai-siyasi və mədəni fəaliyyətlə, Azərbaycandan gələn miqrantların adaptasiyası və ictimailəşdirilməsi ilə məşğul olsun. O zaman ÜAK-nın rəhbərliyi bu ideyaya dəstək verdi, ancaq müxtəlif bəhanələrlə mənim göstərdiyim səylərə baxmayaraq Koordinasiya Şurasının yaradılmasına mane olurdu. Onlar ÜAK-nın AzərRos AFMK-nın və onun regional bölmələrinin köməkliyi ilə yaradıldığını çox tez unudub. Rüstəm Ibrahimbəyov məndən ÜAK-nın yaradılmasına yardım etməyimi xahiş etdi. Məsələ bundadır ki, Rusiya qanunlarına görə Ədliyyə Nazirliyi ÜAK kimi təşkilatı yalnız onun 45 regional şöbəsi olduğu təqdirdə qediyyata ala bilər. Mən öz növbəmdə kömək üçün bütün Rusiya boyunca AzərRos AFMK-nın regional şöbələrinə üz tutdum. Onlar mənə dəstək verdi və təklif etdilər ki, ÜAK-nin təsis qurultayı mənim ad günümdə, yəni martın 5-də keçirilsin. Belə də oldu. 2001-ci ilin martın 5-də Moskvada ÜAK-nın təsis qurultayı keçirildi. O vaxtdan hər il Ümumrusiya Azərbaycan Konqresi öz ad gününü qeyd etməklə eyni zamanda mənim də ad günümü qeyd edir. Bakıda azərbaycanlıların son ümumdünya qurultayında prezident Ilham Əliyev öz çıxışında Azərbaycan disporasına müraciət edərək onları birliyə çağırdı, onun təşkilatları arasında parçalanma olmasın, diaspora bir yumruq kimi birləşsin. O azərbaycanlalırın yaşadığı və işlədiyi bütün ölkələrdə həmvətənlərimizin dövlət və hökumət strukturlarında, qanunverici orqanlarda təmsil olunması üçün səylərin göstərilməsinin vacibliyini qeyd etdi.
Bu təklif Polad Bülbüloğlundan gəlib
Bu qurultaydan dərhal sonra Azərbaycanın Rusiyadakı səfiri Polad Bülbüloğlu AzərRos AFMK-nın, ÜAK-ın və RAGT-nın, onların regionlar şöbələrinin fəallarını müzakirəyə dəvət edərək Koordinasiya Şurasının yaradılması təklifi ilə çıxış etdi. Görüşdə iştirak edənlərin hamısı buna razılıq verdi. Bununla da hər şey bitdi, müşavirənin qərarı isə kağız üzərində qaldı. Nəhayət, Rusiyada belə bir təşktlatın mövcudluğu real oldu. Biz Rusiyada Azərbaycan Təşkilatları Ittifaqını, yəni yüksək tribunalardan haqqında bəhs edilən, lakin onun yaradılması üçün addım atılmayan koordinasiya şurasını təsis edib qeydiyyatdan keçirdik. Yeri gəlmişkən, belə bir təşktlat yaratmaq niyyətində olduğumuzu, onun əsas məqsəd və vəzifəsinin məhz Rusiyadakı bütün azərbaycanlıların birləşməsi olduğu ilə bağlı biz Azərbaycan Prezident Administrasiyasını və Diasporalarla Iş üzrə Dövlət Komitəsinin rəhbəri Nazim Ibrahimovu məlumatlandırdıq. Onlar bizə təşəbbüsümüzü dəstəklədiklərini bildirdi. RATI yarananda isə rəsmi Bakı tərəfindən narazılıqlar və hiddət dalğası doğurdu. Məntiq hanı?! Prezident tribunadan bizi birləşməyə çağırır, istisnasız hamı onu dəstəkləyib. Ancaq RATI-nin yaranması kimlərisə qıcıqlandırdı, ürəkbulanma yaratdı. Üç-dörd il əvvəl Avropada Almaniyadakı azərbaycanlıların Koordinasiya Şurası yaradıldı və Nazim Ibrahimov belə şuranın yaradılmasını Almaniyadakı Azərbaycan icması ilə yanaşı Azərbaycan üçün də vacib hadisə adlandırdı. Bəs niyə indi Rusiyada belə ittifaqın yaradılması onu qane etmir? Biz bu təşkilatı Azərbaycanda deyil, Rusiyada, Rusiya vətəndaşları olan etnik azərbaycanlılar üçün yaratmışıq. Biz burda yaşayır, uşaqlarımızı tərbiyə edir, işləyirik, özümüzü təsdiq edirik. Ona görə də belə təşkilat yaradarkən biz ilk növbədə istəyirdik ki, Rusiyada mümkün qədər milli problemlər az olsun, Azərbaycan icmaları arasında intriqa, müxtəlif xalqların nümayəndələri arasında anlaşılmazlıq olmasın, övladlarımız və nəvələrimizin sabitliyi olsun. Biz millətlərarası razılıq və sülhün təmin edilməsində dövlətə dəstək vermək istəyirik. Məsələn, Kanada, Avstraliya və Amerikada polyakların, ukraynalıların, macarların və s. Koordinasiya Şurası yaradılanda, bu ölkələrin hökumətləri və KIV-i həmvətənlərinin yaşadıqları ölkədə özlərini fəal göstərməsi ilə fəxr edir. Bu da Rusiyada analoji Koordinasiya Şurasının yaradılmasını pis qarşılyanan Azərbaycandakı bəzi məmurların fərqli reaksiyası. Nədir bu? Rusiyada yaşayan azərbaycanlıların Azərbaycan prezidentinin onların qarşısına qoyduğu məqsəd və vəzifələrini yerinə yetirməsinə qarşı çıxmaq? Ya da normal məntiqə sığmayan nəsə başqa şey? Azərbaycandakı bütün məmurlar və ilk növbədə Diaspora ilə Iş üzrə Dövlət Komitəsinin rəhbəri bizim təşəbbüsü dəstəkləməlidir ki, Rüstəm Ibrahimbəyov, Araz Ağalarov, Vahid Ələkbərov, Isgəndər Xəlilov, Telman Ismayılov, Abbas Abbasov, Natiq Ağamirov kimi ləyaqətli və dünyada tanınan şəxslər RATI-nin yaradıb və onun inkişafında iştirak etməyə, Rusiyadakı Azərbaycan təşkilatlarının birliyinə yardım etməyə hazırdılar. Indi Rusiyadakı miqrantlar barədə yeni qanun qəbul edilib. Yenə də Azərbaycandan Rusiyaya işləmək üçün həmvətənlərimiz gəlir. Onlardan kimsə rus dilini, olduğu ölkənin qayda və qanunlarını bilir, kimisə ümumiyyətlə bilmir. RATI-nin fəaliyyət istiqamətlərindən biri onlara rus dilinin, Rusiya qanunlarının öyrənilməsində, qeydiyyata düşməsində, iş üçün razılıq almasında və bir çox digər problemlərin həllində yardım etməkdir. Bu da Azərbaycana və onun vətəndaşlarına böyük kömək olardı.
Vicdansız məmurların ajiotajından təəccüblənmədim
– Necə hesab edirsiniz, RATI-ninin yaradılmasına Azərbaycan məmurlarının qıcıqlandırılmasına səbəb nə ola bilərdi?
– Hesab edirəm ki, problem onların özündədir. Görünür elə qüvvələr var ki, onlara cəmiyyətdə RATI barədə mənfi məlumatların yayılması sərf edir. Qısa müddətdə hələ işə başlamayan təşkilatın mənfi imici yaradılıb. Doğrusu, mən Azərbaycan KIV-də bəzi vicdansız məmurların tapşırığı ilə başlanmış ajiotaja təəccüblənmədim. Həmin qüvvələr RATI-nin Azərbaycan prezidenti və onun ətrafının gözündə xortdan kimi qələmə vermək istəyir. Bütün baş verənləri intriqantların aparat oyunu adlandıra bilərəm. Onlar bu isterikadan öz siyasi dividentlərini əldə etmək istəyir. Beləliklə onlar prezident seçkiləri ərəfəsində ölkə başçısına sədaqətliliyini sübut edir.
Yaltaqlıq və riyakarlığa vərdiş edənlər
– Müsahibələrinizin birində Siz Rüstəm Ibrahimbəyovun müdafiəsinə qalxdınız və bununla da Azərbaycan hakimiyyətində narazılıq yaratdınız. Indi Siz və Rüstəm Ibrahimbəyov RATI-nin təsisçilərinin sırasına daxilsiniz, bu da rəsmi Bakıya meydan oxumaq kimi qəbul oluna bilər. Bu barədə nə deyə bilərsiniz?
– Rüstəm Ibrahimbəyovun RATI-nin həmtəsisçilərindən olması ilə fəxr etmək lazımdır. O bizim millətin qaymağıdır. Bəzilərinin bunu anlamaması mənə ağır gəlir, belə adamların bəzilərinin hakimiyyətdə olması isə ikiqat ağırdır. Yaltaqlıq və riyakarlığa vərdiş edən bu şəxslərə onun müstəqil mövqeyi və məmurların ünvanına sərt tənqidi xoş gəlmir. Rüstəm Ibrahimbəyov kimi adamların Azərbaycandakı situasiya ilə bağlı öz fikrini deməsi və tənqid etməsi çox yaxşıdır. O Azərbaycan xalqının taleyinə biganə deyil, onun tarixi vətəninə görə qəlbi ağrıyır və heç vaxt da həqiqəti deməkdən qorxmur. Bütün dövrlərdə Azərbaycan xalqı həmin öz millətinin vicdanı sayılan şairləri, alimləri, müsiqiçiləri, mütəfəkkirləri ilə məşhur olub. Bunlar Nizami, Fizuli, Nəsimi, Vaqif, Sabir, Şəhriyar, Üzeyir Hacıbəyov, Bülbül, Müslim Maqomayev, Tahir Salayev və digərləridir. Rüstəm Ibrahimbəyov da onlarla bir sırada layiqli yer tutub.
Mənim hakimiyyətdə olanlara tutarlı sualım var
Əgər insanlar cəmiyyətdəki çatışmazlıqlar barədə fikir bildirirsə, bunu normal, sivil qarşılamaq lazımdır, day Azərbaycandakı məmur elitası kimi qarşılamaq lazım deyil. Tanınmış yazıçının tənqidi ilk növbədə həmişə fəxr ediləsi tarixi vətənini çiçəklənən və inkişaf edən ölkə görmək istəyi ilə diqtə edilib. Biz də Rusiyada ona mane olan problemlər barədə danışırıq. Son 12 ildə mənim prezidenti, baş naziri ölkədə korrupsiya, cinayətkarlıq, ksenofobiyanın çiçəklənməsinə görə kəskin tənqid etdiyim xeyli məqaləm çıxıb. Onda belə çıxır ki, mən vətənimi sevmirəm? Əksinə, mən istəyirəm ki, ölkəmdə belə problemlər və onun sadə vətəndaşları arasında narazılıqlar az olsun. Bu tənqidlərə görə mən Rusiya məmurları və KIV tərəfindən hücumlara məruz qalmırdım. Ancaq Azərbaycan məmurları və KIV-in mənə olan münasibətində bunu deyə bilmərəm. Təəssüf ki, azərbaycanlılar üçün nə etsəm də, hər zaman rəsmi Bakı tərəfindən pis qarşılanıb. Özümə qarşı belə münasibəti 2000-ci ildən hiss edirəm. Bu da AzərRos AFMK-nin prezidenti kimi gördüyüm ictimai fəaliyyətimə görə təşükkürdür. Diaspora ilə Iş üzrə Dövlət Komitəsinin və Azərbaycan hakimiyyətinin mənə və rəhbərlik etdiyim təşkilata mənfi münasibəti aydın deyil. Mənim onlara tutarlı sualım var: öz fəaliyyətimizlə kimə və hansı ziyanı vurmuşuq. Mənə və on üç ildir Rusiyadakı azərbaycanlıların maraqlarına xidmət edən AzərRos AFMK-ə nifrətin əsas səbəblərini anlamaq istərdim. AzərRos AFMK həmişə mövcud olduğu dövrdə riyaət etdiyi nizamnaməyə uyğun iş görür. Bizim regional təşktlatlar da nizamnamədə göstərilən işləri həyata keçirir. AzərRos AFMK yaranan gündən təşktlatın fəaliyyətində prioritet istiqamət həmvətənlərimizin hüquq və maraqlarının müdafiəsi olub. Həmçinin ehtiyacı olanlara hüquqi yardım göstərən hüquq xidməti də yaradılıb. Tümen, Tver, Kondopoqa, Volqoqrad, Samara, Nijni Novqorod, Novroqod vilayəti və digər şəhərlərdə müxtəlif illərdə bizim istər Rusiya, istər Azərbaycan vətəndaşı olan həmvətənlərimizin hüquqları kobud şəkildə pozulub. Bir çox hallarda bizim tərəfdən dərhal reaksiya verilməsi tələb olunurdu. Mən, vitse-prezident və AzərRos AFMK fəalları həmin regionlara gedir, şəhər və vilayətlərin administrasiya və güc strukturlarının rəhbərləri ilə görüşüb yerlərdə problemləri həll edirdik, hakimiyyətdən müdaxilə etməyi və yaranan problemlərin araşdırılmasını tələb edirdik.
– Gördüyünüz işlərdən bəzilərini sadalayardınız…
Ardı var
Fizzə
