İran Qərbin sanksiyalarından necə yayınır?

Tehran rejimi iqtisadiyyatın çöküşünü narkotik istehsalını artırmaqla sığortalamaq istəyir

“The Washington Post” qəzetinin yazdığına görə, Qərbin İrana qarşı sanksiyaları ölkənin iqtisadiyyatına ciddi zərbə vurduğu bir vaxtda bəzi iranlılar “sürpriz” mənbədən xeyli qazanc əldə edir. Hətta İran rəsmiləri də etiraf edirlər ki, narkotik maddə sənayesi çox güclü sintetik narkotikin rekord istehsalına nail olub. Qəzetin müxbiri Cobi Uarrik yazır ki, dünyada tiryək aludəçilərinin ən yüksək sayına malik ölkələrdən biri olan İrandan narkotik qaçaqmalçılığının kəllə-çarxa vurması Avropadan tutmuş Cənub-Şərqi Asiyaya qədər bir çox ölkələrdə kəşfiyyat orqanlarının həyəcanına səbəb olub.

Söhbət ondan gedir ki, İranda yüksək keyfiyyətli metamfetamin maddəsi istehsalı “intibah dövrü”nü yaşayır.
Metamfetamin təbabətdə istifadə olunsa da, ABŞ da daxil olmaqla, əksər ölkələrdə təhlükəli narkotik maddə kimi qadağan olunub və nəzarət altındadır. Müxbir əlavə edir ki, narkotik maddələrlə bağlı zorakılıq halları İrandan Qafqaza yayılmaqdadır. Region rəsmiləri bildirirlər ki, narkotik maddə qaçaqmalçıları polis və sərhəd qoşunları ilə amansız döyüşlərə girməkdən belə çəkinmirlər.

“İranın şimal qonşusu olan Azərbaycanda İran qaçaqmalçılarının təkmilləşdirilmiş sürət katerləri Azərbaycanın dəniz patrulu ilə «siçan-pişik» oyunu oynayırlar. Qərb və Yaxın Şərq rəsmiləri bildiriblər ki, İranın narkotik maddə qaçaqmalçıları ABŞ istehsallı gecə durbinlərindən, bombalardan və hətta sərhəd-buraxılış məntəqələrini vurub keçmək üçün zirehli maşınlardan istifadə edirlər”, – deyə “The Washington Post” bildirir.

Xəbərdə bildirilir ki, ABŞ və Qərb kəşfiyyat rəsmilərinin fikrincə, İran ölkədən çıxan narkotik maddələrdən daha çox ölkəyə gələn narkotik maddələrlə maraqlanır və bu sahədə xarici partnyorlarla əməkdaşlıq etmir. ABŞ hüquq-mühafizə orqanlarının vəzifəli rəsmilərindən biri qəzetə deyib ki, «İran qaranlıq bir quyudur». Narkotik maddələr nəqlinin bir sıra marşrutlarını İnqilab Keşikçilərinin Qüds Qüvvələri himayə edir. Qüds Qüvvələri Latın Amerikası da daxil olmaqla, dünya boyunca narkotik maddə nəqlinə nəzarət edən və Livanda mənzillənmiş «Hizbullah» təşkilatı ilə əlbirdir. (azadlıq.org)