Administrasiya nümayəndəsi niyə qeyri-müəyyən açıqlamalar verdi?
Prezident Administrasiyasının Ictimai-siyasi məsələlər şöbəsinin müdiri Əli Həsənovun Moskva səfərinin əsas məqsədi ilə bağlı mətbuatda müxtəlif fərziyyələr səslənməkdədir. Ekspertlər səfərin əsas məramının məhz yeni yaranan RATI ilə bağlı olduğunu vurğulansa da, hakimiyyət yetkililəri bunu təkzib edirlər və səfərin əvvəlcədən planlandırıldığını vurğulayırlar.
Mətbuatda belə bir səfərin planlaşdırıldığı barədə öncədən məlumatın getməməsi və Ə.Həsənovun səfərinin RATI ilə bağlı olduğuna dair suallara cavab verməməsi Kremldəki təmasların indi reallaşmasının təsadüfi olmadığını deməyə əsas verir. Bəs, görəsən ekspertlər Ə.Həsənovun qeyri-müəyyən cavabları barədə nə düşünürlər?
«Görünür, səfərin nəticəsi ilə bağlı müəyyən məyusluq var və real nəticələr əldə olunmayıb»
AXCP sədrinin müavini Fuad Qəhrəmanlı vurğuladı ki, hələ Ə.Həsənovun səfəri reallaşan zaman ehtimal olunurdu ki, Kremldəki görüşlər zamanı əsas məqsəd “milyarderlər ittifaqının” yaradılması ilə bağlı məsələnin müzakirəsi olacaq: “Xatırladaq ki, bu təşkilatın yaradılmasına dövlət səviyyəsində etiraz bildirilmişdi. Və Əli Həsənovun səfəri barədə məlumat yayılan kimi Moskvada Rusiyada yaradılan təşkilatla bağlı da müzakirələrin olacağı mətbuatda fikirlər sırasında səslənmişdi. Bu baxımdan səfərin nəticəsinin nə olmasından asılı olmayaraq hakimiyyətin müzakirələrin gedişi ilə bağlı məlumatları konfidensial saxlanmasına maraq göstərəcəyi gözlənilən idi. Çünki hakimiyyət bu məsələ ilə bağlı Moskvaya hər hansı təkliflər verdiyini və yaxud Moskvadan ”milyarderlər ittifaqının” fəaliyyətinin dayandırılması istəyində olduğunu cəmiyyətə aşkarlasa, bu, iqtidarın əleyhinə yönəlmiş informasiya olardı və hakimiyyətin qorxusunu, narahatlığını büruzə vermiş olardı. Ona görə nəticənin necə olmasından asılı olmayaraq səfərin nəticəsi gizlin saxlanılacaq”.
F.Qəhrəmanlının sözlərinə görə, hazırda mətbuatda müşahidə olunan açıqlamalar deməyə əsas verir ki, səfərin nəticəsi ilə bağlı müəyyən məyusluq var və belə görünür ki, real nəticələr əldə olunmayıb. Bunu gözlənilən hadisə sayan F.Qəhrəmanlı düşünür ki, Moskva boşuna öz istəklərindən vaz keçməyəcək. Və bunun üçünsə qarşılıqlı güzəştlər olmalıdır: “Bizə indi bəlli deyil Azərbaycan hökuməti qarşılıqlı güzəştlər vəd verib, yoxsa verməyib. Bunu gələcək proseslər göstərəcək. Hər halda qarşıdakı dönəmdə ”milyarderlər ittifaqı”nın fəaliyyəti ilə bağlı güman ki, Moskvanın mövqeyi bəlli olacaq. Bu isə səfərin yekunları ilə bağlı müəyyən təəssüratların yaranmasına əsas verəcək. Bəlli olacaq ki, Əli Həsənov görüşdə nəyəsə nail olub, yoxsa yox”.
«Hakimiyyət nəzarətindən kənarda bir təşkilatın mövcud olmasından ciddi narahatdır»
RATI-nin fəaliyyəti ilə bağlı məlumat kasadlığı üzündən konkret fikir söyləməyin çətin olduğunu deyən politoloq Leyla Əliyeva isə hesab edir ki, “milyarderlərin təşkilatı” daha çox hakimiyyət daxilində gedən mübarizənin nəticəsi kimi meydana gəlib. Və Ə.Həsənovun Moskva səfəri daha çox RATI ilə Kreml arasında hansı əlaqənin olmasını araşdırmağa xidmət edir: “Rusiyada belə bir təşkilatın meydana gəlməsi hakimiyyət içində ciddi ziddiyyətdən xəbər verir. Əli Həsənovun səfəri və verdiyi açıqlamalar isə onu göstərir ki, hakimiyyət nəzarətindən kənarda bir təşkilatın mövcud olmasından ciddi narahatdır”.
Hikmət
