Noyabrda mərhum yazıçı Rafiq Tağının qətlə yetirilməsinin bir ili tamam olur.
Mərhumun həyat yoldaşı Mailə Tağıyeva noyabrın 1-də “Media forum” saytına deyib ki, qətllə bağlı cinayət işinin gedişi haqqında heç bir məlumatı yoxdur: “Dəfələrlə müraciət edib işin nə yerdə olduğunu soruşmuşuq, ancaq heç nə öyrənə bilməmişik. Hər müraciətdən sonra cavab göndərirlər ki, işə baxılır, yekunlaşanda sizə xəbər verəcəklər.
Sonuncu dəfə oktyabrın 9-da prezidentə müraciət etdik. Oktyabrın 16-da mən və qayınım İlqar Tağıyev daxili işlər nazirinin müavini Vilayət Eyvazovun qəbulunda olduq. Dedi ki, cinayətkar heç bir iz buraxmayıb. Bu sözdən sonra dövlətə inamım necə itməsin? Dövlət bir cinayətkarın əlində aciz qalarmı? Amma öldü var, döndü yoxdur, Rafiqin qatili tapılmayınca əl çəkməyəcəm”.
Mailə Tağıyeva deyib ki, oğlu Asiman Gəncədə hərbi xidmətdədir, icazə versələr, atasının ilinə gələcək.
2011-ci il noyabrın 19-da Bakıda bıçaqlanan Rafiq Tağı noyabrın 23-də müalicə olunduğu Kliniki Tibbi Mərkəzdə vəfat edib. İndiyədək bu cinayətə görə məsuliyyətə cəlb edilən olmayıb. Cinayət işi Baş Prokurorluğun Ağır Cinayətlərə Dair İşlər üzrə İstintaq İdarəsinin icraatındadır.
