Aksiyaçılar «Sərbəst toplaşmaq azadlığı haqqında» qanuna dəyişikliklərə etiraz edəcək
Ictimai Palata noyabrın 2-də saat 12-də Milli Məclisin binası qarşısında piket keçirəcək. Milli Məclis həmin gün “Sərbəst toplaşmaq azadlığı haqqında” qanuna əlavə və dəyişikliklər layihəsini müzakirə edəcək. Layihə hakimiyyətin razılıq vermədiyi aksiyalara görə sanksiyaların sərtləşdirilməsini, cərimələrin dəfələrlə artırılmasını nəzərdə tutur.
Ictimai Palata dəyişiklikləri qəbuledilməz sayır və buna etiraz olaraq Milli Məclisin qarşısında piket keçirmək haqda qərar verib. Aksiyada “Sərbəst toplaşmaq azadlığına qoyulan qadağaya yox deyirik!”, “Aksiya keçirmək bizim haqqımızdır” və başqa şüarlar səsləndirmək nəzərdə tutulub.
Aksiyaya hazırlıq hansı səviyyədədir, təşkilatlanma necə gedir? Bu suallara cavab tapmaq üçün AXCP Ali Məclisinin sədri Həsən Kərimovla söhbət etdik. Həsən Kərimov deyir ki, texniki və təşkilatlanma işi başa çatdırılıb: “Ictimai Palatanın üzvü olan AXCP piketə qoşulacaq. AXCP təşkilati işləri başa çatdırıb, piketdə iştirak edən insanlarla söhbət olunub. Piketə icazə verilib-verilməməsindən asılı olmayaraq biz piketi keçirəcəyik”.
Ramin DEKO
