Ekspert isə onunla razılaşmır
Nemət Əliyev: «Neft Fondundan ayrılan vəsaiti dövlət büdcəsi vasitəsilə həmin kreditlərin bağlanmasına yönəltmək olar»
Ödənişli əsaslarla oxuyan tələbələrə kreditlərin verilməsi məsələsi bir müddətdir ki, gündəmdədir. Özəl ali məktəblərə qəbul olunan, fəqət təhsil haqqını ödəyə bilməyən neçə-neçə tələbə təhsil almaq arzusunun üstündən xətt çəkib. Bu mənada tələbələrə kreditlərin verilməsi məsələsi aktuallaşıb.
Milli Məclis Elm və Təhsil Komitəsinin sədri Şəmsəddin Hacıyev isə təhsil kreditlərinin əleyhinə olduğunu açıqlayıb. O, “Təhsil krediti” haqqında qanun layihəsinə ehtiyac olmadığını dilə gətirib. Komitə sədri fikrini belə əsaslandırıb ki, təhsil kreditlərinin verilməsi bir sıra problemlərə yol açacaq. Ali məktəb məzunlarının çoxu iş tapmadığı üçün krediti geri qaytarmaya bilər: “Bu isə valideyn və tələbənin borclu qalmasına gətirib çıxaracaq ki, belə problem də heç kim üçün arzuolunan deyil. Bu mənada təhsil kreditlərinin verilməsi indiki məqam üçün münasib deyil”.
Ş.Hacıyev güzəştli kreditlərin verilməsini daha məqsədəuyğun sayaraq, bu məsələ üzərində dərindən düşünüb addım atmağın doğru olduğunu vurğulayıb.
Məsələyə münasibət bildirən iqtisadçı-ekspert Nemət Əliyev isə hesab edir ki, sözügedən açıqlama ölkənin özəl təhsil sektorundakı problemlərin rəsmilərin dililə etirafıdır. Ekspert deyir ki, Azərbaycan hökuməti beynəlxalq aləmdə təsdiqini tapmış Boloniya sisteminə keçib. Inkişaf etmiş ölkələrin tətbiq etdiyi bu sistemin əsas rıçaqlarından biri də məhz təhsil kreditidir: “Ona görə də bu sistemin tələblərini yerinə yetirmək lazımdır. Lakin Şəmsəddin Hacıyev kreditlərin sonradan geri qaytarılmasına təminat olmadığını bildirməklə, ölkədəki işsizlik probleminə diqqəti çəkib. Yəni, gənclərin işsizlik problemi nəhayət ki, rəsmi çevrədən etiraf edilib. Bu açıqlama ilə iqtisadi inkişaf sahəsində köklü sıçrayışların baş verməsi barədə deyilənlər alt-üst olur”.
Ekspert mövcud vəziyyəti ölkədə gənclər siyasətinin yanlış aparılmasının nəticəsi sayaraq, təhsil kreditlərinin dayandırılması barədə deyil, onun hansı yolla verilməsi barədə düşünməyi vacib bilir. N.Əliyevin fikrincə, hökumətdə təmsil olunan şəxslər ölkədəki işsizlik probleminə dərindən diqqət yetirməlidir. Bu problemi gizlətmək deyil, onun aradan qaldırılması istiqamətində fəaliyyət göstərmək lazımdır: “Azərbaycan hökuməti öz siyasətində, real gerçəkliklər fonunda düzəlişlər etməlidir. Yeni iş yerlərinin açılması, vacib sosial-iqtisadi inkişaf sahələri barədə imkanlar arayıb tapmalıdır”.
Ekspert Dövlət Neft Fondunun kifayət qədər maliyyə vəsaitlərini təhsil kreditlərinə yönəltməyin mümkünlüyünü də qeyd edib: “Neft xalqa məxsus olsa, insanlar ondan gələn gəlirlərdən də yararlana bilərlər. Neft Fondundan ayrılmış pulları dövlət büdcəsi vasitəsilə həmin kreditlərin bağlanmasına yönəltmək olar”.
Nigar