«Nə qədər hakimiyyət dəyişməyib, Mahir Abdullayevlə bağlı cinayətin üstü açılmayacaq»
Vidadi Mirkamal: «Bu məsələ ilə bağlı cinayət işinin açılmasına baxmayaraq, hazırkı yanaşma araşdırmaların yekunlarının necə olacağını bəlli edir»
Parlament aksiyalar zamanı həbs olunan vətəndaşlara qarşı tətbiq ounacaq cərimələri fantastik həddə qədər qaldırmaq niyyətindədir. Hazırda 20-50 manat arası olan cərimələrin 500-1000 manat arası artırılması nəzərdə tutulub. Azərbaycan kimi sosial və siyasi narazılıqların pik həddə olduğu ölkədə belə bir sərt qanunun qəbulu, əlbəttə, sırf hakimiyyətə qarşı etirazların qarşısını almağa xidmət edir. Ictimai Palata Koordinasiya Şurasının üzvü, hüquqşünas Vidadi Mirkamal ilə müsahibəmizə ilk olaraq hakimiyyətin bu addımına münasibət öyrənməklə başladıq:
– Hakimiyyətin hazırda bu istiqamətdə apardığı kampaniya və sonda qanuna belə bir düzəlişlərin edilməsi ilə bağlı təşəbbüs iqtidarın aqoniyada olmasını göstərir. Seçkilər ərəfəsində hakimiyyətin belə bir addım atması təsadüfi deyil. Çünki hazırkı mərhələdə hakimiyyətin cinayətlərinin bir qisminin üzə çıxması, hakimiyyət uğrunda mübarizə mərhələsi başlayıb. Yəni bütün bunların nəticəsi onu göstərir ki, hakimiyyət xalqdan qorxur. Iqtidarın bu addımı birincisi, ölkə reallığını əks etdirmir və insanların sərbəst toplaşmaq azadlığını məhdudlaşdırır. Bu da Azərbaycan Konstitusiyasına, “Sərbəst toplaşmaq azadlığı haqqında” qanuna və Azərbaycanın imza atdığı Insan Haqları üzrə Avropa Xartiyasının mətninə birbaşa ziddir. Ikincisi də minimum əmək haqının 80 manat olduğu bir dövlətdə adi halda 500-1000 manat arası, digər hallarda isə 8000 manata qədər cərimə absurddur. Ona görə Azərbaycanda belə bir qanun qəbul olunmamalıdır. Bu, ölkəyə böyük utanc gətirəcək. Beynəlxalq təşkilatlar belə bir qanunun ləğv edilməsini tələb edəcəklər.
RATI-nin gələcəyi qeyri-müəyyəndir
– Gündəmdə olan mövzulardan biri də Rusiyada milyarderlərin bir araya gələrək təşkilat yaratması oldu. RATI-də hakimiyyət təmsilçisinin olmasına baxmayaraq iqtidar bu təşkilatın yaranmasından böyük təlaş keçirdi. Bunun səbəbi sizcə, nəylə bağlıdır?
– Bu təşkilat artıq bir müddət əvvəl yaransa da, onun barəsində və yaranma məqsədləri haqqında heç bir məlumat verilmir. Mən bu məsələyə siyasətçi kimi qiymət vermirəm. Sadəcə olaraq faktlara söykənirəm ki, bu təşkilat barəsində heç bir məlumat verilmir. Digər tərəfdən, təşkilatın üzvlərinin bioqrafiyasını təftiş edəndə görürsən ki, bu qurumun daxilində bir nəfər də olsun Azərbaycan uğrunda mübarizə aparmış şəxs yoxdur. Onlar indiyə qədər sadəcə olaraq öz var-dövlətlərinin artırılması uğrunda çalışıblar. Azərbaycan xalqının müstəqilliyi uğrunda bir qəpik pul xərcləməyiblər. Bu təşkilatda yalnız Rüstəm Ibrahimbəyov xalqın firavan gələcəyi uğrunda son zamanlar mübarizə aparan şəxs kimi tanınıb.
Bu, hakimiyyətdaxili mübarizənin təşkilatlanmış bir formasıdır. Amma bu təşkilatın da gələcəyi hələ xeyli qaranlıqdır. Təşkilatın fəaliyyətinin konkret nəyə yönəldiyi bəlli deyil.
– Bir sıra ekspertlər hesab edir ki, Gürcüstanda Ivanişvilinin qələbəsindən sonra RATI-yə daxil olan şəxslər ruhlanaraq Azərbaycanda da oxşar ssenarini həyata keçirmək istəyir. Başqa bir fərziyə isə ondan ibarətdir ki, RATI-də toplaşan milyarderlər Azərbaycana buraxılmadıqlarına görə belə bir addım atıblar?
– RATI ilə Ivanişvilini müqayisə etmək yanlışdır. Ivanişvili öz varidatını Gürcüstanın inkişafı yolunda xərcləyib və bu istiqamətdə də hələ səylərini bundan sonra da davam etdirmək niyyətindədir. Ivanaşvili hakimiyyətə qarşı idi. RATI-dəkilər isə hakimiyyətə qarşı deyillər, əksinə, iqtidarın içərisindədirlər və bir də ki, Rusiyadakı azərbaycanlıların sona qədər məqsədləri bəlli deyil. Bu şəxslərin Azərbaycanda biznes sahələrinə buraxılmamalarına gəlincə, onlar ölkəmizdə müəyyən dərəcədə təmsil olunublar. Amma həqiqətən də Azərbaycanda bütün sahələr kimi biznes mühiti də hakimiyyətin tam nəzarətindədir.
Gürcüstan-Azərbaycan münasibətləri sınaq qarşısında
– Dövlət başçısının qohumu Araz Ağalarovla Ziyalılar Forumunun üzvü Rüstəm Ibrahimbəyovun eyni təşkilatda birləşməsi müəyyən suallar yaratmamış deyil. Bunu necə izah etmək olar?
– Bu təşkilatın məqsədi hələ bəlli deyil. Bu şəxslərin nəyə görə bir araya gəldiyi və qarşıda hansı planları həyata keçirməyi məqsəd kimi seçdiyi cəmiyyət və bizim üçün qaranlıqdır. Müxtəlif fikirlər söyləmək olar. Amma güman etmirəm ki, onların hamısı həqiqətə yaxındır. Həqiqət o zaman ortaya çıxacaq ki, bu təşkilat özü məsələlərə aydınlıq gətirəcək.
– Gürcüstanın yeni hökuməti Azərbaycan ilə enerji layihələrinə yenidən nəzər sala biləcəyini açıqlayıb. Gürcüstanın enerji naziri bəyan edib ki, bir sıra əməkdaşlıq layihələri nəzərdən keçirilə bilər. Bundan əvvəl isə Ivanişvili oxşar bəyanatla çıxış etmişdi. Gürcüstanın yeni hökuməti ilə Azərbaycanın iqtisadi əlaqələri necə qurula bilər?
– Düşünmürəm ki, Gürcüstanla Azərbaycan arasında münasibətlər köklü dərəcədə gərginləşə bilər. Gürcüstan bir çox mənalarda Azərbaycandan asılıdır. Bura həm tranzit kəmərləri, həm də enerji daşıyıcıları ilə təminat daxildir. Saakaşvilinin Azərbaycanla qurduğu əlaqələr Gürcüstana yalnız mənfəət gətirib və güman etmirəm ki, Ivanaşvili bu əlaqələrin üzərindən xətt çəkəcək.
Gülər Əhmədovanın addımları YAP üçün adidir
– Gülər Əhmədova hakimiyyətə “ağzımı açdırmayın” bəyanatını verdikdən sonra ona qarşı olan kampaniya səngidi. Hazırda isə Gülər Əhmədovanın partiya üzvlüyü ilə bağlı məsələ də həllini tapmır. Bu məsələyə gah Mərkəzi Aparatın, gah da yerli təşkilat şöbəsinin baxmalı olduğu bildirilir. G.Əhmədovaya qarşı bu məsələ ilə bağlı konkret addımın atılmaması nəylə bağlı ola bilər?
– YAP sıralarında olan insanların əksəriyyəti Gülər Əhmədova kimi şəxslərdir. Gülər Əhmədovanın bu dərəcədə ifşaedici faktlardan sonra YAP-da qalması təəccüblü deyil. YAP üçün bu, adi haldır. Ona görə YAP güman etmir ki, Gülər Əhmədovanın addımı onlar üçün böyük bir ləkədir. Gülər Əhmədovanın addımları hər hansı işlə bağlı deyil, bu, bir sistem idarəetməsidir. Parlamenti Gülər Əhmədova formalaşdırmır ki? Milli Məclisi formalaşdıran şəxslərin adları da və Gülər Əhmədovanın kimə xidmət etdiyi də məlumdur. Ona görə YAP-ın Gülər Əhmədova ilə bağlı hər hansı tədbir görməsi önəmli deyil. Ona görə də sadəcə olaraq videoların açıqlanmasından sonra qalxan səs-küylə bağlı müəyyən addımlar atmaq lazım idi.
– Gülər Əhmədova barəsində açılmış cinayət işinin yanlış maddə ilə olsa belə sona çatdırılacağına inanırsınızmı?
– Gülər Əhmədova azadlıq fədaisi deyil. Gülər Əhmədova cinayətkar sistemin bir ünsürüdür. Ona görə də Gülər Əhmədovanın prinsipcə nə danışması da bəllidir. Hamı bilir ki, Gülər Əhmədova pulu kimə verib və kimin üçün pul alıb. Bu məsələ ilə bağlı cinayət işinin açılmasına baxmayaraq münasibət bəllidir və araşdırmaların da nəylə yekunlaşacağı aydın məsələdir.
Mahir Abdullayev cinayəti sistemin eybəcərliklərini ifşa edir
– Elşad Abdullayevin açıqladığı videolarda, ünvanladığı materiallarda hüquq-mühafizə orqanlarının yüksək çinli məmurlarının adları çəkilir. Başqa tərəfdən isə bəyan edilir ki, bu iş prezidentin nəzarətindədir. Bu baxımdan adları çəkilən şəxslərlə bağlı hər hansı addımın atılacağını gözləyirsinizmi?
– Güman etmirəm ki, bu işin sonu müsbət nəticələnəcək. Çünki Elşad Abdullayev indiyə qədər həmin materialları istər Prezident Aparatına, istərsə də başqa dövlət strukturlarına ünvanlayıb və heç bir tədbir görülməyib. Sovet dövründən qalma ən yaxşı üsul bir komissiyanın yaradılmasıdır. Bu hakimiyyət köhnə üsul ilə gedərək komissiya yaradıb. Şəxsən mən cinayətin üstünün açılacağını gözləmirəm. Çünki Mahir Abdullayev cinayətinə hüquq-mühafizə sistemindən xeyli insanlar əlaqəlidir. Burada sistemin eybəcərliyi üzə çıxır. Ən əsası vətəndaşın oğurlanması faktı var. Nə qədər bu hakimiyyət siyasi iqtidardadır, Mahir Abdullayevin cinayəti tam ədalətli prinsiplərlə açılmayacaq. Bu cinayəti yalnız növbəti hakimiyyət aça bilər. Indiki şəraitdə hakimiyyət özünü ifşa etməyəcək.
– Hakimiyyət təmsilçiləri bəyan edir ki, onlar Elşad Abdullayevin açıqlayacağı faktlardan narahat deyillər. Amma bu günlərdə E.Abdullayev bəyan edib ki, onun əlində məmurlar və onların yaxın qohumları ilə bağlı rüşvət halını əks etdirən kifayət qədər sənədlər var. Bu fakta yanaşmanız necədir?
– Elşad Abdullayevin hüquq-mühafizə orqanlarına yazdığı məktublar onu göstərir ki, onda hakimiyyət təmsilçilərinin, hüquq-mühafizə orqanlarının əməkdaşlarının rüşvətlə bağlı video görüntüləri var. Elşad Abdullayev artıq müraciətlərində Milli təhlükəsizlik nazirinin birinci müavini Hilal Əsədovun, başqa yüksək çinli məmur Vilayət Eyvazovun adını çəkir. Hələ ki, onda olan video görüntülərin nədən bəhs etdiyini biz bilmirik. Belə görünür ki, Elşad Abdullayev prezidentin təşkil etdiyi komissiyanın rəyini gözləyir. Bu rəy qaneedici olmasa, gizli videoların ictimaiyyətə açıqlanması istisna edilmir.
– Eks-prezident Əbülfəz Elçibəyin ailəsi ictimaiyyət və prokurorluğa müraciət edərək Xalq Hərəkatının mərhum liderinin məzarının açılmasına imkan yaratmamağı xahiş edib. Bu məsələ ilə bağlı hakimiyyətin spekulyasiyaya yol verməsi nə dərəcədə düzgündür?
– Bu məsələyə iki aspektdən yanaşmaq olar. Birinci mənəvi aspektdir. Mənəvi cəhətdən belə bir şəxsiyyətin adının bu tip məsələdə hallanması və onun ətrafında olmuş xeyli şəxslərin buna etirazlarının nəzərə alınmaması yolverilməzdir. Amma məsələnin hüquqi tərəfinə gəlincə, qanuna görə, hüquq-mühafizə orqanları müəyyən etsələr ki, burada cinayət tərkibi var, məzar, yaxınlarının etirazına baxmayaraq, açıla bilər. Amma bunun üçün ciddi dəlillərin olması və ona istinad gərəkdir.
Xəyal
