Parlamentə girən 3 müxalif partiya prezidentin və hökumətin istefasını gündəmə gətirəcək
Ukraynada oktyabrın 28-də keçirilmiş parlament seçkiləriylə bağlı səslərin sayılması prosesi davam edir. Ötən günə olan məlumata görə, səslərin 98 faizi sayılıb. Sayılmış səslərdən sonra hakim “Regionlar” partiyasının 30.18, eks baş nazir Yuliya Timoşenkonun liderlik etdiyi “Vətən” partiyası 25.39, boks üzrə olimpiya çempionu Vitaliy Kliçkonun “Zərbə” partiyası 13.88, kommunistlər 13.24, “Azadlıq” partiyasının da 10.38 faiz səs topladığı müəyyənləşib. Əlavə edək ki, ATƏT və ABŞ Ukraynadakı seçkilər zamanı ciddi qanun pozuntularına yol verildiyini bildirib.
Parlamentə düşdüyü müəyyənləşən 3 əsas müxalif təşkilat “Zərbə”, “Azadlıq” və “Vətən” partiyasının prezident Viktor Yanukoviçin impiçment olunması üçün əməkdaşlıq edəcəyi açıqlanıb. “Azadlıq” partiyasının rəhbərliyində təmsil olunan Andrey Moxnikin sözlərinə görə, 3 partiya prezidentin vəzifəsindən kənarlaşdırılması prosedurlarına başlaya bilər. O, əlavə edib ki, Kliçkonun lideri olduğu “Zərbə” partiyası müxalif təşkilatların parlamentdə birgə əməkdaşlıq planını yaxın günlərdə açıqlayacaq. Moxnik qarşıda dayanan ilk məsələnin Yanukoviçin impiçmenti və hökumətin istefaya göndərilməsi olacağını bildirib.
