“France 24” Meksikada başlanan etirazlara diqqət ayırdı
Meksikanın paytaxtı Mexikoda Azərbaycan hökumətinin hesabına salınmış parkda ucaldılan eks ölkə başçısı Heydər Əliyevin heykəliylə bağlı qalmaqal davam edir. Bir qrup meksikalı hüquq müdafiəçisi və ictimai fəalın heykəlin götürülməsi tələbiylə keçirdiyi aksiyadan sonra dünyanın aparıcı media quruluşları məsələyə diqqət ayırıb. Əlavə edək ki, etirazçılar Heydər Əliyevin hakimiyyəti illərində Azərbaycanda insan haqları və söz azadlığının məhdudlaşdırılması ənənəsinin möhkəmləndirilməsini əsas götürərək eks ölkə rəhbərinin heykəlinin götürülməsini istəyirdi.
Yaranmış qalmaqalla bağlı ABŞ mətbuatında, Avropanın nüfuzlu qəzetlərində məlumatlar tirajlanmışdı. Bir neçə gün əvvəl Fransanın “France 24” kanalının internet səhifəsində “AFP” agentliyinin heykəl ətrafında yaranmış qalmaqalla bağlı reportajını yayımlayıb. Xəbərdə bildirilir ki, Heydər Əliyevin Mexikodakı heykəlinə etiraz edənlər onun SSRİ “KQB”-nin generalı olmasını, insan haqları və söz azadlığının məhdudlaşdırılmasına görə tənqid edilməsini əsas gətirərək abidənin götürülməsini tələb edir.
Meksikalı fəal İsus Robls Meluf deyib ki, Mexikonun mərkəzində insan haqlarını pozan diktatorun heykəlinin qoyulması meksikalıların hüquqlarının pozulmasıdır. İzabel Aquiler adlı ictimai fəal isə özünün “Twitter” səhifəsində yazıb ki, Heydər Əliyevə heykəl qoyulursa onda Şimali Koreyanın keçmiş diktatoru Kim Çen İrə, Rusiya prezidenti Vladimir Putinə də heykəl ucaldılmalıdır.
İnformasiya şöbəsi
