ARDNŞ-in “Neft daşları” NQÇI-də və “28 may” adına NQÇI-də növbəli sistemlə salışan fəhlə və mühəndisləri iş yerinə gedib çıxmaq üçün min əzabla qatlaşırlar. Bu barədə “Azadlıq”a adının çəkilməsini istəməyən mühəndislərdən biri məlumat verib.
Məlumata görə, adətən dənizin ortasında olan iş yerlərinə getmək üçün fəhlə və mühəndisləri ora vertolyotlar aparırdı. Nadir hallarda isə gəmilərdən istifadə edilirdi. Amma son vaxtlar ARDNŞ və AZAL prezidentləri arasındakı soyuq münasibətlər nəticəsində fəhlələr nəinki sərnişin, hətta SSRi dövründən qalma sınıq-salxaq yük gəmiləri ilə iş yerlərinə daşınır.
Mənbəmizin dediyinə görə, həm “Neft Daşları”na, həm də “28 may” NQÇI-yə “General Əsədov” sərnişin gəmisi hərəkət edirdi. Indi bu gəminin yerinə də yük gəmisi işləyir. Sahildə oracan olan təxminən 120 km məsafəni fəhlələr 8-9 saata qət edirlər ki, külək və soyuq onların səhhətlərinə ciddi xətər yetirir.
Adıçəkilən neft çıxarma idarələrinə vertolyotların uçuşunun dayandırılmasının isə əsas səbəbi ARDNŞ-in AZAL-ın törəmə şirkəti olan Azal Oil-satdığı aviasiya kerosinin qiymətinin qaldırmasıdır. Hər iki şirkət bu ilin əvvəlindən qiymətlə bağlı ümumi razılığa gəlsələr də sonradan ARDNŞ kerosinin qiymətini birtərəfli qaydada qaldırdı. Əvəzində AZAL isə ARDNŞ-ə öz parkından vertolyot ayrılmasını da müvəqqəti dayandırıb. Iki oliqarxın davasından isə fəhlələr və sıravi mühəndislər əziyyət çəkir.
Hikmət
