Yaxud Gədəbəyin təhsil sahəsinə rəhbərlik edən Ramiz Məmmədovun «yaş senzi» əməliyyatı
Gədəbəy sakini Əzizə Rüstəmova ölkə başçısı Ilham Əliyevə, xanımı Mehriban Əliyevaya və təhsil naziri Misir Mərdanova müraciət edib. Onun müraciətinin bir surəti də “Azadlıq”a daxil olub. Əzizə Rüstəmovanın müraciətinin ixtisarla təqdim edirik:
“Mən 1978-ci ildə təyinatla Gədəbəy rayonunun ucqar dağ kəndinə müəllimə işləməyə göndərilmişəm. 1985-ci ildən rayon mərkəzinə dəyişdirilmişəm. 1986-cı ildən 1996-cı ilə kimi Rayon Təhsil Şöbəsində metodist, 1996-cı ildən 2002-ci ilə kimi rayonun geridə qalmış Arıxdam kənd məktəbinə direktor göndərilmişəm. Həmin məktəbdə gözəl abu-hava yaratmışam, müəllimlərlə yaxşı münasibətlər qurmuşam, bu səbəbdən həm kənddə müəllimlər arasında, həm də kənd camaatı arasında böyük hörmətim vardır. 2002-ci ildən Gədəbəy şəhər 1 saylı orta məktəbinə direktor göndərilmişəm. Burada da gözəl şərait yaratdım. Rayonda ilk dəfə olaraq şagirdləri məktəbli formasına keçirtdim. Rayonda keçirilən bütün idman yarışlarında həmişə qalib olmuşuq…
Bu il 1 nəfər şagirdimizə qızıl medal verilib. Həmin şagirdimiz 630 bal yığaraq BDU-nun hüquq fakültəsinə qəbul olub. Qızıl medal mən direktor işlədiyim müddətlərdə (18 il) rayon üzrə yalnız mənim rəhbərliyim etdiyim məktəbdən olub. Bütün bu işlərdə bir direktor kimi mənim fəaliyyətim çox olub. Bunlara görə də hər il mənə Rayon Icra Hakimiyyətindən və Rayon Təhsil Şöbəsindən fəxri fərmanlar verilib. Ancaq bu fəxri fərmanlar Rayon Təhsil Şöbəsinin müdiri Məmmədov Ramiz tərəfindən güclə verilib. Ona görə ki, onun mənimlə heç vaxt arası olmayıb, məcburi işim xatirinə bu fəxri fərmanlar verilib – axı görülən işləri danmaq olmaz. Məmmədov Ramiz hər vəchlə mənim işimə pəl vurmağa çalışıb, hər zaman istəyib ki, məni pisikdirsin. Illər uzunu, dəfələrlə məktəbdə yersiz yoxlamalar apartdırıb, lakin heç vaxt heç nəyə nail ola bilməyib. Rayonda və nazirlikdə yaxşı “arxası” olduğu üçün ona heç bir söz deyən yoxdur. Belə olmasa idi, bu 10 ildə o bildiyini etməzdi. Dediyimə əyani sübut: 2 il bundan qabaq mənim adım “əməkdar müəllim” fəxri adı almaq üçün nazirliyə göndərildi, lakin Məmmədov Ramizin özü demişkən Təhsil Nazirliyində olan “dost”larının səyi nəticəsində mənim adım qaldı, nazirlikdən 1 kənd məktəbinin adı Prezident Aparatına getdi və ona ad verildi. Həmin məktəb direktoru, Məmmədov Isax bu adla bu il yaşı çox olmasına baxmayaraq Məmmədov Ramiz onunla müqavilə bağlayıb işdə saxladı. Bunu Məmmədov Ramiz məqsədli şəkildə etmişdi.
Bu il sentyabrda dərsləri böldüm, cədvəli düzəltdim, sentyabrın 15-də rayon IHB-nın birinci müavini Q.Paşayevin iştirakı ilə dərs ilinin açılışını etdik, bütün müəllimlər cədvəllərini götürdülər, dərslərini bildilər, 17 sentyabr 2012-ci ildən dərslərini davam etdirdilər. Təhsil Şöbəsinə aid olan bütün hesabatları verdim. Oktyabr ayının 5-də gözlədik ki, Təhsil Şöbəsinin müdiri və yaxud işçilərindən biri gələrək bizim məktəbdə müəllimlər günü münasibətilə bir tədbir keçirəcək (həmçinin 7-sində mənim ad günümü qeyd edəcəklər). Çünki, rayonda ən böyük kollektiv bizik. Ona görə də bizim umub-küsməyə haqqımız var. Ancaq Məmmədov Ramiz əvvəlcədən mənə dediyi kimi 02 oktyabrda “yaş senzi” bəhanəsilə işdən çıxarılmağım üçün Təhsil Nazirinə məktub göndərdi, 08 okyabrda isə nazirlik mənə əmr verib. 02 oktyabrda Ramiz Məmmədovun məktub yazmasını bizim kollektiv bildi və 50 nəfərin iştirakı ilə həm prezidentə, həm də Təhsil Nazirinə müraciət göndərdilər ki, direktorumuza bir illik möhlət hüququ verin, işləsin. Nazirlikdən mənə bildirdilər ki, sizin necə işləməyinizi Rayon Icra Hakimiyyəti Başçısı, Rayon Təhsil Şöbəsi və kollektiviniz daha yaxşı bilir, əgər səni onlar yaxşı işçi kimi tanıyırlarsa, işlətmək istəyirlərsə biz çox şad olarıq, eyni zamanda 19 okyabr 2012-ci il tarixdə Təhsil Naziri Misir Mərdanov Gədəbəydə Mədəniyyət Evində çıxış edərək həmin sözləri deyib.
Məmmədov Ramiz isə həmişə mənə bildirirdi ki, sənin yerinə 10000 AZN pul verirlər, onsuz da səni çıxarıb sənin yerinə hansı direktoru qoysam o pulu alacağam. O hər şeyi pul ilə ölçür.
Bir faktı diqqətinizə çatdırım: Rayon Icra Hakimiyyətinə məxsus “Şevrolet” markalı niva avtomobili Rayon Təhsil Şöbəsinə verildi, Məmmədov Ramizə yox. Rayonda isə o qədər qabaqcıl məktəb var idi ki, niyə avtomobili məhz Məmmədov Ramiz özəlləşdirdi? Ona bu səlahiyyəti kim vermişdir?
Hər il sentyabr başlayanda mən cibimdən neçə qutu emulsiya, rəng, fırça, sement alaraq məktəb təmir etdirirəm, xarici görkəmini dəyişirəm, həmin malları hansı mağazadan aldığımı da deyə bilərəm. Lakin, hər il bizim məktəbin həmçinin başqa məktəblərin təmirinə nə qədər pullar silinir, sağlıq olsun bunların hamısı yavaş-yavaş açılacaq. Onda Siz də biləcəksiniz ki, Məmmədov Ramiz kimdir.
Bəlkə də deyəcəksiniz ki, işdən çıxarılır deyə belə ərizələr yazır, bir Siz yox, bir çox adamlar belə düşünə bilər. Lakin, Təhsil Naziri həmişə çıxış edərkən bildirir ki, bir direktor yaxşı işləyirsə onun 70 yaşı olsa belə biz onunla işləyəcəyik. 19 oktyabr 2012-ci il tarixdə Gədəbəy rayonunun Mədəniyyət Evində şəxsən Təhsil Naziri çıxış edərək bildirdi ki, işçini işdən azad edəndə tələsikliyə yol verməyin, onun fəaliyyətini tam araşdırın, sonra azad edin”.