«Cinayət işinin dərhal dayandırılmasını, Elçibəyin ruhunun rahat buraxılmasını tələb edirik!»
Keçmiş prezident Əbülfəz Elçibəyin ailəsi onun zəhərlənməsi iddiasıyla başlanmış cinayət işinə növbəti dəfə kəskin şəkildə etirazını ifadə edib. Elçibəyin xanımı Həlimə Əliyeva, oğlu Ərturqut Əliyev və qızı Çilənay Səmədbəyli birgə müraciət yayaraq, sözügedən cinayət işinin dərhal dayandırılmasını və bəyin ruhunun rahat buraxılmasını tələb edib.
Mərhum prezidentin ailə üzvləri bildirir ki, son bir neçə ayda Elçibəyin adı ətrafında gedən prosesləri, başlanmış cinayət işini və bu işin ətrafında cərəyan edən hadisələri diqqətlə izləyirlər. Bu cinayət işinə xitam verilməsi üçün bir neçə dəfə hüquq-mühafizə orqanlarına müraciət etmək istəsələr də, işlə bağlı araşdırmalardan xəbərsiz olduqlarından belə bir çağırış etməyiblər. Lakin son zamanlar, Elçibəyin məzarının açılmasına hazırlıq getməsi barədə yayılan məlumatlar onları ciddi şəkildə narahat edir.
“Biz ailənin adından, bütün hallarda məzarın açılmasına qarşı olduğumuzu Ərturqutun vasitəsilə mətbuata bildirmişik. Amma hadisələrin getdikcə xoşagəlməz məcraya yönəldiyini nəzərə alaraq, bir daha həm aidiyyəti qurumlara, həm də ictimaiyyətə müraciət edirik”, – deyə Elçibəyin ailə üzvlərinin Baş Prokurorluğa və mediaya müraciətində bildirilir.
“Elçibəyə qarşı mənəvi məsələlərdə səhv edənlər xeyir görməyib”
Elçibəyin xanımı və övladları budəfəki müraciətdə bir daha vurğulayırlar ki, onun məzarının açılmasına, barəsində bu vəsilə ilə aparılan hər hansı cinayət işinə və əməliyyata qarşıdılar:
“Biz eyni zamanda, Əbülfəz bəyin adının və məzarının ətrafında aparılan spekulyasiyaları və siyasi oyunları pisləyirik. Əbülfəz Elçibəyin kim olduğunu, necə bir həyat yaşadığını və Azərbaycan xalqı üçün nələr etdiyini hamıdan yaxşı elə bu xalq, həm də bu gün bu oyunları aparanlar bilir. Biz sadəcə olaraq, Elçibəyin məzarının açılmasının tək siyasi yox, həm də böyük bir mənəvi məsələ olduğunu bu məsələdə əli olanların diqqətinə çatdırmaq istəyirik. Elçibəyin həm sağlığında, həm də haqq dünyasına getdikdən sonra ona qarşı mənəvi məsələlərdə səhv edənlər xeyir görməyib. Ona görə də ailə tərəfindən hər hansı razılıq olmadan atılacaq hər bir addımın həm siyasi, həm də mənəvi məsuliyyətini bəri başdan nəzərinizə çatdırmaq istəyirik. Tanrı və tarix hər bir kəsə öz əməlinə görə gec də olsa, qiymət verəcək. Buna əmin olmaq üçün elə tarixin özünə baxmaq kifayətdir.
Biz Elçibəyin ailəsi olaraq hər zaman haqqın, ədalətin tərəfində olmuşuq, ömrümüzün sonuna kimi də bu yolda davam edəcəyik. Verilən bəyənatlara, baş verən hadisələrə və qanunvericilikdə necə nəzərdə tutulmasına baxmayaraq, biz Elçibəyin ölüm səbəbilə bağlı açılmış cinayət işinin dərhal dayandırılmasını tələb edir, onun ruhunun narahat edilməməsini hər kəsdən xahiş edirik!”
Mirmahmud Mirəlioğlu da Elçibəylə bağlı ifadə verdi
Yeri gəlmişkən, oktyabrın 29-da Klassik Xalq Cəbhəsi Partiyasının (KXCP) sədri Mirmahmud Mirəlioğlu da bu cinayət işi üzrə ifadə vermək üçün Bakı Şəhər Prokurorluğuna çağırılıb. Onu ifadə verməyə prokurorluğun Istintaq Idarəsinin mühüm işlər üzrə müstəntiqi Vaqif Süleymanov dəvət edib.
Prokurorluğa getməmişdən əvvəl jurnalistlərə açıqlama verən M.Mirəlioğlu hansı iş üzrə ifadə verəcəyindən xəbərsiz olduğunu deyib: “Müstəntiqin göndərdiyi çağırışda sadəcə, ”icraatımda olan cinayət işi üzrə” ifadəsi yazılıb. Cinayət işinin nömrəsi və cinayətin hansı maddələrlə qaldırılması göstərilməyib”.
M.Mirəlioğlu deyib ki, bir ay müddətində telefonla bir neçə dəfə zəng edib onu prokurorluğa çağırıblar: “Mən imtina etmişəm. Demişəm ki, çağırış vərəqəsi göndərin, onun əsasında hərəkət edim. Bu gün (dünən) çağırış göndərdilər, mən də getdim”.
M.Mirəlioğlu Bakı şəhər Prokurorluğunda ifadə verdikdən sonra “teleqraf.az”a açıqlamasında bildirib ki, Elçibəyin zəhərləndiyini təsdiq etməsi barədə bəzi saytlarda yayılmış informasiyaların heç bir əsası yoxdur: “Mənə zəng edib dedilər ki, bizdə belə bir məlumat var. Mən də prokurorluqdan hələ indi çıxdığımı və belə bir şey olmadığını dedim. Mən onu da demişəm ki, bu işdə hallanan adlar mənim üçün yenidir və mən ümumiyyətlə, bu iddiaları absurd sayıram”.
KXCP sədri əlavə edib ki, bəzi məsələlər istintaq sirri olduğundan daha ətraflı danışmağı məqbul saymır.
