“Bu işdə hallanan adlar mənim üçün yenidir və mən ümmiyyətlə bu iddiaları absurd sayıram”
Klassik Xalq Cəbhəsi Partiyasının (KXCP) sədri Mirmahmud Mirəlioğlu oktyabrın 29-da ifadə vermək üçün Bakı Şəhər Prokurorluğuna çağırılıb. Onu ifadə verməyə prokurorluğun İstintaq İdarəsinin mühüm işlər üzrə müstəntiqi Vaqif Süleymanov dəvət edib.
Prokuroluğa getməzdən öncə jurnalistlərə açıqlama verən M.Mirəlioğlu hansı iş üzrə ifadə verəcəyindən xəbərsiz olduğunu deyib: «Müstəntiqin göndərdiyi çağırışda sadəcə “icraatımda olan cinayət işi üzrə” ifadəsi yazılıb. Cinayət işinin nömrəsi və cinayətin hansı maddələrlə qaldırılması göstərilməyib».
M.Mirəlioğlu deyib ki, bir ay müddətində telefonla bir neçə dəfə zəng edib onu prokurorluğa çağırıblar: «Mən imtina etmişəm. Demişəm ki, çağırış vərəqəsi göndərin, onun əsasında hərəkət edim. Bu gün çağırış göndəriblər, mən də gəlmişəm».
Klassik Xalq Cəbhəsi Partiyasının sədri Mirmahmid Mirəlioğlu Bakı şəhər Prokurorluğunda ifadə verdikdən sonra “Teleqraf.az”a açıqlama verib. O bildirib ki, Elçibəyin zəhərləndiyini təsdiq etməsi barədə bəzi saytlarda yayılmış informasiyaların heç bir əsası yoxdur: “Mənə zəng edib dedilər ki, bizdə belə bir məlumat var. Mən də prokurorluqdan hələ indi çıxdığımı və belə bir şey olmadığını dedim. Mən onu da demişəm ki, bu işdə hallanan adlar mənim üçün yenidir və mən ümmiyyətlə bu iddiaları absurd sayıram”. KXCP səfri əlavə edib ki, bəzi məsələlər istintaq sirri olduğundan daha ətraflı danışmağı məqbul saymır.
