Moskvadakı mənbələrdən daxil olan məlumata görə, Prezident Administrasiyasının ictimai siyasi məsələlər şöbəsinin müdiri, Azərbaycan iqtidarının sözçüsü sayılan Əli Həsənov hazırda Rusiyanın paytaxtındadır. Bunu “Musavat.com” saytı yazıb. Saytın yazdığına görə, məlumatda bildirilir ki, o, Kremldə bir sıra dövlət qurumları, müvafiq strukturlarla görüşlər keçirir. Görüşlərin əsas mövzusu xeyli maraqlıdır – dövlətlər və regionlararası münasibətlər, diaspora məsələləri…
Məlumatı dəqiqləşdirmək üçün edilən zənglərə Əli Həsənov cavab verməyib.
Saytın şərhinə görə, bu ranqdakı iqtidar yetkilisinin məhz indiki məqamda – Rusiya ilə bağlı məlum mövzuların gündəmdə olduğu zaman kəsimində Moskvaya ezam olunması düşündürücüdür. Belə ki, son günlər Azərbaycan siyasəti Moskvada qurulan və şərti olaraq “Milyarderlər İttifaqı” adlanan qurumla məşğuldur. Söhbət Rusiyanın Azərbaycan Təşkilatları İttifaqında (RATİ) gedir. Azərbaycan iqtidarı bu ittifaqın yaranmasını təqdir etməmişdi. Bir çoxları isə hesab edir ki, təşkilatı Kreml Azərbaycan hakimiyyətinə təzyiq göstərmək üçün yaradılıb.
