İctimai Palata piket üçün meriyaya müraciət edib

İctimai Palata noyabrın 2-də Milli Məclisin binası qarşısında aksiya keçirmək üçün Bakı Şəhər İcra Hakimiyyətinə müraciət edib.

İctimai Palatanın katibi, Müsavat Partiyası başqanının müavini Gülağa Aslanlı “Media forum” saytına deyib ki, müraciətdə noyabrın 2-si saat 12-də Milli Məclisin binası qarşısında piket keçirilməsinə şərait yaradılması istənilib: “Bakı Şəhər İcra Hakimiyyətinin mövqeyindən asılı olmayaraq İctimai Palata piketin keçirilməsində israrlıdır və aksiya mütləq keçiriləcək”.

Noyabrın 2-də Milli Məclis “Sərbəst toplaşmaq azadlığı haqqında” qanuna əlavə və dəyişikliklər layihəsini müzakirə edəcək. Layihə hakimiyyətin razılıq vermədiyi aksiyalara görə sanksiyaların sərtləşdirilməsini, cərimələrin dəfələrlə artırılmasını nəzərdə tutur. İctimai Palata dəyişiklikləri qəbuledilməz sayır və buna etiraz olaraq Milli Məclisin qarşısında piket keçirmək haqda qərar verib. Aksiyada “Sərbəst toplaşmaq azadlığına qoyulan qadağaya yox deyirik!”, “Aksiya keçirmək bizim haqqımızdır” və başqa şüarlar səsləndirmək nəzərdə tutulub.