Ağstafada icra hakimiyyətinin və polisin təzyiqinə baxmayaraq tədbir baş tutub
Sentyabrın 9-da Ağstafa rayonunda Ictimai Palatanın yerli qurumu növbəti sessiyasını keçirib. İcra hakimiyyəti və polis tədbirin izdihamlı alınmasının qarşısını almaq məqsədi ilə öncədən büdcə təşkilatında çalışanlara tədbirə qatılmamaq göstərişi verib. İcra hakimiyyətinin və polisin təzyiqinə baxmayaraq tədbir baş tutub.
Amma əvvəlcədən gözlənildiyi kimi toplantıya 100 deyil, 43 nəfər qatılıb. Toplantı İP üzvlərindən birinin həyət evində keçirilib. On nəfər yeni üzv təşkilat sıralarına qatılıb. Bundan başqa 5 nəfər Ümid Partiyasının Ağstafa rayon şöbəsinin sıralarından ayrılaraq AXCP-yə üzv olub. Toplantıya sədirliyi AXCP Ağstafa rayon şöbəsinin sədri Marif Salahov və Ali Məclisin üzvü Hamlet Mursaqulu edib. Sessiyada İP rəhbərliyindən təşkilatın regional təşkilatlanma komitəsinin üzvü, AXCP Rəyasət Heyətinin üzvü Eldar Hüseynov iştirak edib. Tədbirdə ölkədəki ictimai-siyasi durum müzakirə olunub. Son zamanlar «Azadlıq» qəzetinin üzləşdiyi maliyyə problemlərinə də toxunulub və toplantı iştirakçılarından 20 nəfər qəzetə abunə yazılıb.
Eyni gün daha bir sessiya İP-nin Nizami rayon regional şöbəsində baş tutub. İP sıralarına 20-yə yaxın yeni üzv qəbul olunub. Toplantıda AXCP sədrinin müavinləri Nurəddin Məmmədli, Asəf Quliyev, Müsavat başqanının müşaviri Mutafa Hacıbəyli mövzud ictimai-siyasi durumla bağlı çıxış edərək, İP üzvlərini maraqlandıran sualları cavablandırıblar. Tədbiri AXCP-nin Nizami rayon şöbəsinin sədri Zülfüqar Eyvazlı və Müsavatın yerli rayon təşkilatının sədri Zakir Məmmədzadə aparıb. Həbsdən çıxdıqdan sonra rayon şöbəsi ilə bağlı ilk toplantıya qatılan Z.Eyvazlını tədbir iştirakçıları alqışlayıblar.
Sessiya iştirakçıları sonda AXCP sədri Əli Kərimliyə qarşı təzyiqlərə etiraz əlaməti olaraq, ona qarşı irəli sürülən qondarma ittihamlar və rayonu narahat edən sosial problemlərlə bağlı etiraz bəyanatı qəbul ediblər.
Xəyal
