Göydələnlərin qaz problemi 2 ilə həll olunacaq

Azərbaycanda hündürmərtəbəli yeni yaşayış binalarının qazla təminatı məsələləri yaxın 2 ildə həll olunmalıdır.
Bu, prezident Ilham Əliyevin təsdiqlədiyi “Korrupsiyaya qarşı mübarizəyə dair 2012-2015-ci illər üçün Milli Fəaliyyət Planı”nda nəzərdə tutulur.
Sənəddə Bakı Şəhər Icra Hakimiyyəti, Fövqəladə Hallar Nazirliyi və Dövlət Neft Şirkətinə bu məsələnin 2013-2014-cü illər ərzində həll edilməsi tapşırılıb. Milli Plana əsasən, şəhərsalma və tikinti qanunvericiliyinin və bu sahədə inzibati idarəçiliyin təkmilləşdirilməsi də gözlənilir. Bu addımlardan biri tikintiyə icazələr verilməsi sahəsində “bir pəncərə” sisteminin tətbiqi olacaq. Nazirlər Kabineti bununla bağlı təkliflərini 2013-cü il ərzində verməlidir.