Bakının Suraxanı rayonundakı Müsəllah yerində yerləşən, eramızdan əvvəlki dövrə aid, 200 əsr yaşı olan qədim paleolit düşərgəsi dağıdılır.
Bu barədə APA-ya Azərbaycan Milli Elmlər Akademiyasının (AMEA) Arxeologiya və Etnoqrafiya İnstitutunun Abşeron arxeoloji ekspedisiyasının rəhbəri İdris Əliyev bildirib. Onun sözlərinə görə, sözügedən abidə dövlət qeydiyyatındadır və yerli əhəmiyyətli arxeoloji abidə hesab edilir: “Abidənin dağıdılmasına ötən ildən başlanılıb. Dəfələrlə müraciət etməyimə baxmayaraq heç bir tədbir görülmür. Bütün günü ərazidən traktorlarla torpaq, daş aparılır”.
İ. Əliyev bildirib ki, arxeoloji abidəyə belə müdaxilə yolverilməzdir: “Abidədə hər hansı iş aparılarkən mütləq AMEA və digər aidiyyatı qurumlar məlumatlandırılmalı, Arxeologiya və Etnoqrafiya İnstitutundan arayış alınmalıdır”.
