İlham Əliyev sentyabrın 20-də Avropa İttifaqı-Azərbaycan Parlament Əməkdaşlıq Komitəsinin nümayəndə heyətilə görüşdə elə belə də deyib: “Bakının mərkəzində müxalifət azad şəkildə mitinqlər keçirib. Onlar bir neçə yüz adam toplayıblar. İnsanların niyə bu nümayişlərə getməməsi ayrı məsələdir…” Əvvəlcə heyrət etdim ki, bir dövlətin başçısı milyonlarla insanın qarşısında, bu qədər həqiqətə uyğun olmayan fikirləri necə səsləndirə bilər? 17 sentyabr mitinqi ərəfəsi 86 nəfər mitinq təşkilatçısı olan AXCP funksioneri saxlanıldığı, mitinqin sonunda heç bir əsas və bəhanəsiz yüzlərlə insanın döyülərək, polis bölmələrinə aparıldığı, saxlanılanlardan 12 nəfər gəncə inzibati həbs cəzası verildiyi halda necə iddia etmək olar ki, “Bakının mərkəzində müxalifət azad şəkildə mitinqlər keçirib.”? 11 sentyabr mitinqində böyük bir izdiham yaşandığına sosial şəbəkələr vasitəsilə 1 milyondan artıq insan şahid olub. Bundan sonra bir dövlət başçısı necə deyə bilər ki, “onlar bir neçə yüz adam toplayıblar.”?
Sonra təəccübüm keçdi və bir daha əmin oldum ki, MSK və digər qurumlar saxtakarlığı özbaşına etmirlər, televiziyalar, hətta bəzi YAP funksionerləri də yalan ruporu olaraq, indiki simasız duruma öz istəklərilə düşməyiblər. Bir ölkədə dövlət başçısı belə danışırsa, bu ölkənin MSK-sından düzlük, hüquq mühafizə orqanlarından qanunçuluq, məhkəməsindən ədalət, televiziyasından həqiqət gözləmək özü də sadəlöhvlük olar.
