Bu gün Bakı Ağır Cinayətlər Məhkəməsində I Avropa Oyunlarının “Atletlər kəndi”nin nəqliyyat deposunda Avstriya yığmasının atletlərini avtobusla vurmaqda təqsirləndirilən avtobus sürücüsü Vəli Əhmədov, həmçinin Nəqliyyat Nazirliyinin (NN) Dövlət Avtomobil Nəqliyyatı Xidmətinin şöbə rəisi Hüseyn Salamov, “Təhlükəsiz şəhər” kamerasının operatoru Elçin Həsənov və NN-in Dövlət Avtomobil Nəqliyyatı Xidmətinin Sərnişindaşıma Departamentinin məsləhətçisi Fərid Əmiraslanovun cinayət işi üzrə məhkəmə prosesi davam edib.
Hakim Cavid Hüseynovun sədrliyi keçirilən prosesdə bildirib ki, prokuror Eldar Həmzəyev əmək məzuniyyətinə getdiyi üçün iş üzrə prokuror dəyişdirilib. Onu digər dövlət ittihamçısı Mübariz Mirili əvəzləyib. Sonra prosesdə təqsirləndirilən şəxslər son söz deyiblər. Vəli Əhmədov vəkilinin sözləri ilə kifayətlənib. Digər təqsirləndirilən Hüseyn Salamov son sözlə çıxışında bildirib ki, 12 dövlət qulluğunda çalışıb:
“Dövlət və dövlətçiliyimizə hər zaman sadiq olmuşam. Cinayət işində heç zaman təqsirli bilməmişəm. 2 azyaşlı uşaqımı da nəzərə alıb barəmdə bəraət hökmü çıxarılmasını istəyib. Fərid Əmiraslanov da çıxışında heç bir günahı olmadığını və bəraət hökmünün çıxarılmasımı istəyib . Proses saat 17:00 yə qədər fasilə elan edib.
Xatırladaq ki, prokuror çıxışında məhkəmədən V.Əhmədovun 3 il, F.Əmiraslanov 5 il və H.Salamovla E.Həsənovun isə hər biri 7 il müddətinə azadlıqdan məhrum edilməsini təklif etmişdi.
Qeyd edək ki, keçən il iyun ayının 11-də, I Avropa Oyunlarının “Atletlər kəndi”nin nəqliyyat deposunda, “Bakubus” MMC-yə məxsus avtobus hərəkət zolağından çıxaraq piyadalar üçün səki ilə gedən Avstriyanın sinxron üzgüçülük üzrə yığma komandasının üzvləri Vanessa Sahinoviçə və Luna Paceri vurub. Hadisədən sonra avtobusun sürücüsü V.Əhmədov, Nəqliyyat Nazirliyinin Dövlət Avtomobil Nəqliyyatı Xidmətinin şöbə rəisi H.Salamov və “Təhlükəsiz şəhər” kamerasının operatoru E.Həsənov adlı şəxs tutulub. NN-in Dövlət Avtomobil Nəqliyyatı Xidmətinin Sərnişindaşıma Departamentinin məsləhətçisi F.Əmiraslanov isə işlə bağlı istintaqa cəlb olunsa da, barəsində həbs qətimkan tədbiri seçilməyib. O, zaminə buraxılıb. V.Əhmədova qarşı Cinayət Məcəlləsinin 263.1-ci (yol hərəkəti və nəqliyyat vasitələrinin istismarı qaydalarını pozma, avtomobil, tramvay və ya digər mexaniki nəqliyyat vasitəsini idarə edən şəxs tərəfindən yol hərəkəti və ya nəqliyyat vasitələrinin istismarı qaydalarının pozulması, ehtiyatsızlıqdan zərərçəkmiş şəxsin sağlamlığına az ağır və ya ağır zərər vurulmasına səbəb olduqda), H.Salmanov və E.Həsənova qarşı 308-ci (vəzifə səlahiyyətlərindən sui-istifadə), F.Əmiraslanova qarşı isə 314-cü (səhlənkarlıq) maddəsi ilə ittiham irəli sürülüb. 2016-cı ilin yanvar ayının 15-də Bakı Ağır Cinayətlər Məhkəməsinin qərarına əsasən, cinayət işinin baxılmasına xitam verilib və iş ibtidai istintaqa qaytarılıb. Buna səbəb kimi zərərçəkmiş şəxslərin ifadələrinin alınmaması və onların hüquqlarının pozulması göstərilib. Cinayət işi yenidən baxılması üçün Bakı Ağır Cinayətlər Məhkəməsinə göndərilib. (Lent.az)
